Artıq qiymət artımı rəsmən təsdiqlənməyə başlayıb. Marketlərin vitrinlərində mallar yeni qiymətlərlə öz yerini tutub.
Musavat.com-un əməkdaşının paytaxt Bakıda bir neçə marketdə apardığı müşahidə zamanı məlum olub ki, dünən qiymət artımı olmayan mağazalar da artıq qiymətləri yeniləyiblər. Buna səbəb olaraq isə bildirilir ki, dünən mağazalarda olan mallar devalvasiyadan əvvəl alındığından köhnə qiymətlərlə müştərilərə satılıb.Artıq nəhəng holdinqlər belə, qiymət artımının olduğunu təsdiqləyib. Ərzaq mallarında isə qiymət artımı məhsula görə 30-40 faiz arasında dəyişir. Xaricdən idxal olunan mallar artıq 40-50 faiz bahalaşıb. Yerli məhsullarda isə artım nisbətən az - 20-30 faiz arasında dəyişir.Müşahidə apardığımız marketlərdə vitrinlərdəki qiymətlərin yenisi ilə əvəz olunduğunu və bu prosesin sürətlə davam etdiyinin şahidi olduq. Çörək və un məmulatlarında hələlik artım müşahidə edilmir. Qənd, çay, yağ, süd məhsullarında isə ən azı 30 faizədək bahalaşma var.Ölkə bazarının böyük hissəsini yerli məhsullarla təmin edən "Azərsun" Holdinqdə də qiymətlər 20-30 faiz bahalaşıb. Bu gün holdinqdə bu məsələ ilə bağlı toplantı keçirilib və yekun qərar qəbul edilib. Artıq bütün mallar yeni qiymətlərlə mağazalara paylanılır.Azərbaycanda şirniyyat mallarının satışında böyük pay hissəsi olan "Veysəloğlu" şirkəti də qiymət artımını təsdiqləyən şirkətlərdəndir.Devalvasiyanın yaşandığı ilk gündə - dekabrın 21-də mağazalarda köhnə qiymətlərlə satılan malları almaq istəyən müştərilərə limit qoyulmuşdu. Böyük market şəbəkələri bir maldan yalnız bir ədəd almağa icazə verirdi.Dekabrın 21-də əksər mağazalarda insan axını müşahidə olunurdu. Vətəndaşlar sonuncu dəfə ucuz qiymətlərlə mal almaq imkanından yararlanmaq istəyirdilər. Buna görə də mağazaların əksəriyyətində ərzaq qıtlığı yaranmışdı. Bu gün isə mağazalarda böyük izdiham yaşanmır, ərzaq qıtlığı yoxdur. Çünki satılan bütün mallar yeni - bahalaşmış qiymətlərlə alıcılara təqdim olunur.İri marketlər şəbəkəsində hələlik yalnız yumurta və siqaret qıtlığı var. Yumurta istehsalı ilə məşğul olan firmaların əksəriyyəti satışı müvəqqəti olaraq, dayandırıb.Marektlərdə müşahidə apararkən əvvəlki qiyməti ilə müqayisədə bəzi malların qiymətində bu şəkildə artımının şahidi olduq:
36 ədəd "Pampers" - 16,86 manat (Köhnə qiymət 14,05 manat)
1 lt "Pepsi" - 70 qəpik (Köhnə qiymət 50 qəpik)
100 qramlıq "Berqa" çayı - 1,55 manat (Köhnə qiymət 1,20 manat)
1 lt "Nataktari" - 1,27 manat (Köhnə qiymət 1 manat)
1 lt "Pal süd" - 1,45 manat (Köhnə qiymət 1,20 manat)
1 kq qənd - 1,35 manat (Köhnə qiymət 1,05 manat)
Xatırladaq ki, dekabrın 21-dəki devalvasiyadan sonra 1 dollar 1.55 manat, avro isə 1,6850 manat təşkil edir. Bu ilin fevralın 21-dən isə Mərkəzi Bankın yeni qərarı ilə dolların məzənnəsi 1,05 manat olub, avronun məzənnəsi isə 1,1950 manat təşkil edirdi.Əlavə edək ki, iqtisadiyyat və sənaye naziri Şahin Mustafayev də devalvasiyadan sonra qiymət artımının qaçınılmaz olacağını deyib. Nazir idxaldan asılı olan məhsulların qiymətində artımın müşahidə olunacağını, lakin süni şəkildə devalvasiyadan asılı olmayan səbəbdən qiymət artımının qarşısının alınması üçün işlər görəcəklərini deyib.
Mənbə: Milli.Az