Xəzəryanı ölkələrdə mövcud ticarət dövriyyəsi qənaətbəxş deyil. ANS TV-nin məlumatına görə, bu problemə toxunan İranın Limanlar və Dənizçilik Təşkilatının baş direktoru Mohəməd Səyidnejad qeyd etdi ki, dövriyyəni artırmaq üçün hazırki imkanlardan daha yaxşı istifadə etmək lazımdır.
“Bakı Beynəlxalq Dəniz Ticarət Limanı” QSC-nin Baş direktoru Taleh Ziyadov isə bu yaxınlarda Azərbaycan Prezidentinin Tranzit Yük daşımalar üzrə Koordinasiya Şurasının yaradılması ilə bağlı imzaladığı sərəncamın əhəmiyyətindən danışıb.
O bildirdi ki, beynəlxalq yükdaşıma xətlərinin Azərbaycandan keçməsini təmin etmək üçün tranzit yüklərin daşınmasına böyük güzəştlərin tətbiq edilməsi nəzərdə tutulub. Bu güzəştlər əsasən Şərq-Qərb və Cənub-Şimal nəqliyyat dəhlizlərindən istifadə edənlər üçün tətbiq ediləcək.
Eyni zamanda bu güzəştlərdən Transxəzər Beynəlxalq Nəqliyyat Marşrutunun iştrakçıları da faydalana biləcəklər.
Taleh Ziyadov həmçinin onu da qeyd edib ki, ticarəti inkişaf etdirmək və rahat gediş-gəlişi təmin etmək məqsədilə Bakıda ən böyük liman tikilir. Bu təbii ki, Xəzərdə ən böyük liman olacaq.
Rusiya, Qazaxıstan, Türkmənistan və İranın liman rəhbərləri də çıxış edərək öz limanlarının imkanlarından və müxtəlif sahələrdə əməkdaşlıq əlaqələrinin genişləndirilməsinin zəruriliyindən danışdılar.
Mənbə: ANS PRESS