Türkiyənin İzmir şəhərində Mahmut Atalay və Yaşar Erkanın xatirəsinə yeniyetmə sərbəst, yunan-Roma və qadın güləşçilər arasında 18-ci beynəlxalq turnir keçirilib. Turnirdə Azərbaycanı yeniyetmə qızlardan ibarət yığma komandanın üzvləri təmsil edib.
Güləş Federasiyasından ANS PRESS-ə bildirilib ki, böyük məşqçi Həsrət Məmmədyarov və məşqçi İsaməddin Hüseynovun rəhbərliyi altında turnirə qatılan güləşçilərimiz ümumilikdə 2 qızıl, 1 gümüş və 2 bürünc medal qazanaraq, komanda hesabında turniri 4-cü sırada tamamlayıb.
Zemfira Ələkbərli (38 kq) və Şəbnəm Əhmədova (56 kq) bütün rəqiblərindən üstün olaraq, fəxri kürsünün ən yüksək pilləsində qərarlaşıb. Sona Tumarxanova (49 kq) yalnız final görüşünü məğlub başa vurub və gümüş medalla kifayətlənib. Bürünc medalları isə Səbinə Həmzəlzadə (49 kq) və Tatyana Varantsova (56 kq) qazanıb. Gülcahan Hacıyeva (46 kq) isə, bürünc medal uğrunda həlledici görüşdə uduzub və turniri 5-ci sırada başa vurub.
Görüşlərin idarə edilməsində beynəlxalq dərəcəli hakim Vüqar Şükürov ölkəmizi təmsil edib.
Mənbə: ANS PRESS