Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) iş yerlərində əmək haqqı və digər sosial xarakterli ödənişlərin işçilərə qanunvericiliyin tələblərinə uyğun olaraq vaxtlı-vaxtında ödənilməsi sahəsində nəzarət tədbirlərini gücləndirir.
Nazirliyin İctimaiyyətlə əlaqələr şöbəsindən ANS PRESS-ə bildirilib ki, bu ilin aprelində Xidmətin həyata keçirdiyi məqsədyönlü tədbirlər zamanı işəgötürənlər tərəfindən ümumilikdə 273107 manat məbləğində gecikdirilmiş sosial xarakterli ödənişlərin işçilərə ödənilməsi təmin olunub ki, bu da ötən ilin müvafiq dövrü ilə müqayisədə 24,9 dəfə çoxdur.
Həmin məbləğin 272536 manatı (99,7 faiz) əmək haqlarından, qalanı isə zərərə görə ödənc, sosial müavinət və kompensasiyalardan ibarət olub. Sosial xarakterli ödənişlərin işçilərə ödənilməsinin gecikdirilməsi hallarının əsasən sahibkarlıq subyektlərində baş verdiyi müəyyən edilib.