Bu gün Avstriyanın paytaxtı Vyanada İranın nüvə proqramına dair danışıqların növbəti raundu başlayır.
ANS PRESS-in məlumatına görə, danışıqlara İran və Avropa Birliyinin xarici işlər idarələri başçılarının müavinləri Abbas Araqçı və Helqa Şmidtin görüşü ilə start veriləcək. Danışıqlar zamanı İranın nüvə proqramına dair razılaşmanın mətni üzərində işlər davam etdiriləcək.
Mayın 15-də isə danışıqlara ABŞ, Böyük Britaniya, Fransa, Almaniya, Rusiya və Çindən ibarət "altılıq" ölkələrinin xarici işlər nazirlərinin müavinləri qoşulacaq.
İranın nüvə proqramına dair son danışıqlar mayın əvvəlində Nyu-Yorkda baş tutmuşdu. Aprelin əvvəlində isə İran və "altılıq" ölkələri arasında nüvə proqramı üzrə razılaşmanın əsas bəndləri müəyyən edilmiş və çərçivə razılaşması əldə olunmuşdu.
Nüvə razılaşmasının imzalanması üçün qoyulan müddət bu il iyunun 30-da başa çatır.