Bakıda keçiriləcək birinci Avropa Oyunlarına 46 gün qalır. Ölkəmizdə və Avropada ilk dəfə təşkil olunacaq bu idman yarışına hazırlıq işləri yüksək səviyyətə davam edir. Təbii ki, beynəlxalq miqyaslı yarışın keçiriləcəyi ərazilərdə sıxlığın, burada daimi yaşayan sakinlərin evlərinə rahat gedib-gəlmələri üçün yarana biləcək problemlərin aradan qaldırılması, eləcə də obyektlərin, ətraf ərazilərin mühafizəsi, idmançıların təhlükəsizliyinin yüksək səviyyədə təmin olunması əsas məsələlərdəndir.
ANS PRESS-in araşdırmasına görə, Avropa Oyunlarının keçiriləcəyi idman arenaları ətrafında nəzarət zonaları yaradılıb və xüsusi nişanlarla qeyd olunub. Xüsusi işarələnmiş həmin ərazilərdə yaşayan və avtomobili olan sakinlərə parkinq icazəsi, yəni xüsusi buraxılış vərəqələri veriləcək. İş yerləri oyunların keçiriləcəyi ərazilərdə olanlar isə ictimai nəqliyyatdan istifadə edəcəklər.
Bunun üçün vətəndaşlar şəxsiyyət vəsiqəsi, yaşadığı ünvanı təsdiq edən sənəd və maşının texniki posportunun sürəti ilə Mənzil İstismar Sahələrinə müraciət edərək icazə kağızını ala bilərlər. İcazə kağızı mayın 15-dən sonra sakinlərə paylanılacaq.
Paytaxt sakinləri verilən bu qərardan məmnun qalsalar da, bunun bəzi problemlərə yol açmaması üçün ciddi nəzarətin olmasına ehtiyac duyulacağını söyləyiblər.
Bakı Şəhər İcra Hakimiyyəti bununla bağlı yeni mexanizmlərin hazırlandığını və tətbiq olunacağını bildirib. Belə ki, Bakı-2015 Avropa Oyunları zamanı vətəndaşlar avtomobillərindən sərbəst şəkildə istifadə edəcəklər. Lakin vətəndaşların avtomobillərini yol kənarlarında saxlaması qeyri-mümkün olacaq. Belə ki, belə hallar olarsa, yol kənarlarında saxlanılan avtomobillər evakuator vasitəsilə ərazidən aparılacaq və cərimə tətbiq ediləcək. Nəqliyyat vasitələrinin hərəkətinə məhdudiyyət DİN və BDYP tərəfindən həyata keçiriləcək.
Ekspertlərin fikrincə, Avropa Oyunları ərəfəsində paytaxta avtomobil axını müşahidə olunacaq. Bununla əlaqədar müəyyən yerlərdə nəqliyyat vasitələrinin hərəkətinə məhdudiyyət qoyulması təbiidir. Həmin ərazilərdə yaşayan sakinlərin öz şəxsi avtomobilləri ilə mənzillərinə sərbəst giriş-çıxışını təmin etmək üçün onlara buraxılış vəsiqəsi verilməsi normal qarşılanmalıdır.
Onların sözlərinə görə, vətəndaşlar mümkün qədər şəxsi avtomobillərindən yox, Avropa Oyunları zamanı xüsusi ayrılacaq ictimai nəqliyyat vasitələrindən istifadə etmələri daha faydalıdır.
Bakı-2015 Avropa Oyunları ərəfəsində əhalinin istifadəsi üçün xüsusi yol ayrılacaq. Nəqliyyatı İntelektual İdarəetmə Mərkəzi (NİİM) Avropa Oyunları üzrə nəqliyyat qərargahı seçilib. Yarışlar zamanı yolarda xüsusi zolaqlar olacaq. İdmançılar, yarışların keçirləcəyi ərazilər arasında maşrut istiqamətləri hazırlanıb və həmin maşrutların hərəkət edəcəyi istiqamətlərdə ilk sınaq keçirilib.
Təhlükəsizliyə gəlincə, Avropa Oyunları zamanı ictimai qaydanın, təhlükəsizliyin etibarlı təmini, yarış və qeyri-yarış obyektlərinin mühafizəsi məqsədilə Dislokasiya Planı hazırlanaraq təsdiqlənib. Daxili İşlər Nazirliyinin xidmətlərinin, ərazi polis orqanlarının, nizami polis hissələrinin və Daxili Qoşunların hərbi qulluqçularının fəaliyyətinin koordinasiyası, tədbirin təşkilatçıları, aidiyyəti dövlət qurumları ilə qarşılıqlı əlaqələrin təşkili, əməliyyat şəraitinin fasiləsiz izlənilməsi, vəziyyətin dəyişməsinə operativ reaksiya verilməsi, hüquq qaydasına nəzarətin həyata keçirilməsi məqsədilə müvafiq əmrlə Əməliyyat Qərargahı və əlavə köməkçi qərargahlar yaradılıb.
DİN-nin mətbuat xidmətindən bildirildiyi kimi, Avropa Oyunları zamanı nəzarət-buraxılış yerlərində xüsusi yoxlama avadanlıqdan istifadə ediləcəyi planlaşdırılır. Bakı şəhərində 290 nöqtədə videomüşahidə kameralarının quraşdırılması üzrə işlərin 70%-i artıq tamamlanıb. Hazırda "Təhlükəsiz Şəhər" sisteminin respublika üzrə (Metropoliten də nəzərə alınmaqla) 2039 nöqtədə 8085, o cümlədən paytaxtda 1356 nöqtədə 4225-dən çox kamerası quraşdırılıb.
Avropa Oyunlarına hazırlığın mühüm komponentlərindən olan yol hərəkəti təhlükəsizliyinin təşkili ilə əlaqədar 2014-cü ildə və cari ilin ötən dövründə 798 ədədi günəş enerjisi ilə qidalanan olmaqla 2377 yeni yol nişanı qoyulub və ya yenisi ilə əvəzlənib, 25 təkrarlanan işıqfor obyekti quraşdırılıb, küçə və yollarda 224 min paqonmetr cizgiləmə işləri aparılıb.
Həmçinin, ictimai asayişin qorunmasında iştirak edəcək bayır xidməti əməkdaşlarının peşə hazırlığının və vətəndaşlarla ünsiyyət səviyyəsinin yüksəldilməsi məsələlərinə də böyük önəm verilərək lazımi tədbirlər davam etdirilib. Belə ki, daxili işlər orqanlarında xidmətə qəbul zamanı xarici dil bilən namizədlərə üstünlük verilib, habelə «Polis əməkdaşının davranış qaydaları» adlı metodik vəsait hazırlanaraq öyrənilməsi üçün bütün orqan və hissələrə göndərilib, Çevik Polis Alayının və paytaxtın orqan və hissələrinin bayır xidmətinin ümumilikdə 1000 əməkdaşı üçün ingilis dili kursları təşkil edilib.
Ümumiyyətlə, Bakı-2015 ilk Avropa Oyunlarının keçirildiyi günlərdə azarkeşlərin və qonaqların idman arenalarına və mehmanxanalara rahat getmələri üçün xüsusi məntəqələr yaradılacaq. Bu məntəqələr metronun "Gənclik”, "20 Yanvar”, "Koroğlu”, "Elmlər Akademiyası”, "28 May” və "Nizami” stansiyalarının yaxınlığında quraşdırılacaq. Azarkeşlər və qonaqlar həmin məntəqələrdə "Ekspres” avtobusların xidmətindən yararlanacaqlar. Yüksək səviyyəli xidmət göstərəcək avtobuslar yarış günlərində Bakı-2015 üçün nəzərdə tutulan marşrut üzrə hərəkət edəcək.
Mənbə: ANS PRESS