"Hörümçək adam" kimi tanınan fransalı alpinist Alen Rober daha bir binanı fəth edib.
ANS PRESS-in məlumatına görə, o Birləşmiş Ərəb Əmirliklərinin Dubay şəhərindəki 75 mərtəbəli "Kayan Qülləsi"nə dırmanıb. 52 yaşlı alpinist 307 metr hündürlüyündə olan göydələnə 70 dəqiqəyə çıxıb. Hər zaman olduğu kimi bu dəfə də alpinist heç bir sığorta olmadan, yalnız təbaşir və yapışqan maddənin köməkliyi ilə binanın üzərində hərəkət edib.Hündürmərtəbəli binalara heç bir qoruyucu vasitə olmadan çıxan Alen Rober 2011-ci ildə Dubayda dünyanın ən hündür binasına dırmanmışdı. Həmin vaxt "Hörümçək adam" 828 metrlik "Bürc əl-Xəlifə" göydələnini 6 saata fəth edə bilmişdi.
Mənbə: ANS PRESS