Gürcüstan azərbaycanlılarına şad xəbər

Bu gün Kvemo-Kartli (Şərqi Gürcüstan) bölgəsində daha 23 məscid Gürcüstan Müsəlmanları İdarəsinin mülkiyyətinə keçirilib.ANS PRESS-in məlumatına görə, bu barədə Gürcüstanın dini işlər üzrə Dövlət Komitəsinin rəhbəri Zaza Vaşakmadze xəbər verib. Qərar dini qurumların mülki və maliyyə məsələlərinin araşdırılması yönündə keçirilən iclas zamanı verilib. 2 iclasın nəticələrinə görə isə cəmi 44 məscid dövlət balansından Gürcüstan Müsəlmanları İdarəsinin balansına keçirilib. Gürcüstan Müsəlmanları İdarəsinin başçısı azərbaycanlı Şeyx Ramin İgidovun sözlərinə görə, ölkədə 300-dən çox məscid və ibadətgah var.“Bu məscidlərdən bir çoxunun taleyi məlum deyildi. Belə ki, bizim əlimizdə hüquqi sənəd yox idi. Buna görə də biz dini işlər üzrə Agentliyə məscidlərin statusunun müsəlman idarəsinə verilməsi xahişi ilə müraciət etdik. Məsələ bizim xeyrimizə həll olundu”, - deyə Ramin İgidov bildirib.Qeyd edək ki, Kvemo-Kartli Gürcüstanda azərbaycanlıların sıx yaşadığı bölgədir.

Mənbə: ANS PRESS