İtaliyada şaquli qəbiristanlıq inşa ediləcək. ANS PRESS-in məlumatına görə, bu qeyri-adi məzarlığın Şekspirin Romeo və Culyettasının şəhəri Veronada ucaltmağı planlaşdırırlar.
Göydələn qəbiristanlıq 33 mərtəbəli olacaq və burada 24 min məzarın yerləşdirilməsi nəzərdə tutulub. Belə qeyri-adi layihənin inşasına verilən qərar adi məzarlıqlar üçün artıq şəhərdə yer qalmadığı ilə əlaqələndirilir. Şəhər sovetinin məmurları artıq qabaqcadan layihəni bəyəndiklərini açıqlayıblar.
"Cielo Infinito" tikinti şirkəti hündürmərtəbəli qəbiristanlığın - qülləsində xaç olacaq futurist qalanın şəhər ətrafında tikiləcəyini bildirib. Burada mərhumun külü, eləcə də cəsədi tabutda basdırıla bilər.
Bununla yanaşı, şəhərin rəsmi nümayəndəliyi layihə barədə sonuncu qərarın hələ qəbul edilmədiyini, bunun üçün Şəhər Sovetində səsvermənin keçiriləcəyini bildirib. Məmurlar eyni zamanda göydələn - qəbiristanlıq tikməyə qərar vermiş şirkətin təqdim etdiyi layihənin çox əlverişli olduğunu da qeyd ediblər. Tikinti şirkəti bu qeyri-adi tikinti üçün əraziyə real qiymətindən dəfələrlə artıq pul təklif edir.
Əgər bu ərazi əvvəl 750 min avroya satılırdısa, "Cielo Infinito" 11.5 milyon ödəməyə hazır olduğunu bəyan edib. Şirkət qeyri-adi qəbiristanlığın inşasında israrlıdır.
Dünyasını dəyişənlər üçün çoxmərtəbəli bina ucaltmaq ideyası Avropada ilk dəfə Norveçdə reallaşdırılıb. Layihə təxminən 1 il bundan əvvəl Norveçdə təqdim edilib. Hazırda Hindistanda belə bir tikinti var. Mərhumların külləri "Moksha tower" adlı məzarlıqda saxlanılır. Analoji tikinti artıq Braziliyada da var.
Mənbə:ANS PRESS