Bakıda səhər saatlarından başlayan güclü yağış yollarda avtomobillərin hərəkətinə böyük maneələr yaradıb.
ANS PRESS-in məlumatına görə, bəzi yollarda tıxac yaranıb. Bir çox ərazilərdə yollara su dolduğundan maşınların hərəkətində çətinlik yaradıb.
Əsasən Binəqədi, Biləcəri, Nərimanov rayonu ərazisində, “20 yanvar” metrosu yaxınlığında, “Şamaxinka” deyilən ərazidə və bir çox yollarda maşınların hərəkəti iflic vəziyyətinə düşüb. Hətta yol qəzaları da baş verib.
Bakı şəhər Dövlət Yol Polisi İdarəsinin ictimaiyyətlə əlaqələr bölməsinin rəisi Vaqif Əsədov ANS PRESS-ə açıqlamasında bildirib ki, həqiqətən də bu gün səhər saatlarında paytaxt yollarında böyük problemlər yaşanıb.
“Hətta bu gün səhər saatlarında maddi zərərlə nəticələnən yol qəzaları olub. Qəzalar 4 müxtəlif yerlərdə qeydə alınıb”, - deyə Vaqif Əsədov bildirib.
Bakı yol polisi bu gündən havanın daha da pisləşəcəyini nəzərə alaraq sürücüləri daha da diqqətli olmağa çağırıb.
“Bakı şəhər Dövlət Yol Polisi İdarəsi bir daha sürücülərin nəzərinə çatdırır ki, yağışlı hava şəraiti avtomobilin asfalt yol üzərində sürüşməsinə, əyləc basıldığı zaman istər-istəməz avtomobilin müvazinətinin itirilməsinə və tormoz məsafəsinin uzanmasına səbəb olur. Sürücülər ilk növbədə tərkibində rezin məmulatının faizi yüksək olan mövsümi təkərlərdən istifadə etməlidirlər. Belə hava şəraitində sürücülər avtomobilin texniki cəhətdən saz olmasına, xüsusilə şüşəsilənin işlənməsinə, işıq cihazlarından düzgün istifadə olunmasına diqqət yetirilməlidir”, - deyə Vaqif Əsədov bildirib.