Son zamanlar keçəllik hətta cavanlar arasında geniş yayılıb. Qadınlarla müqayisədə kişilər bu vəziyyətdən daha çox əziyyət çəkirlər desək, yanılmarıq. Çünki qadınlar zaman-zaman müxtəlif baxım və maskalar sayəsində məhv olan tük köklərini canlandıra bildikləri halda kişilərin bu üsuldan istifadə etməməsi saçların daha tez kövrəkləşməsinə və bir müddət sonra dazlaşmaya səbəb olar.
Maraqlı haldır ki, insanların əksəriyyəti keçəlliyi normal qəbul etdiyi halda, əkəriyyət, ümumiyyətlə, saçsız başı qəbul etmir və nə yolla olur olsun əvvəlki saçlarına sahib olmaq üçün çalışır.
30-40 il öncə saç tökülməsi, əsasən, orta yaşlı və qoca kişilərin problemi sayılırdısa, artıq keçəlləşməni özünə dərd edənlər arasında qadınlar və uşaqların da sayı sürətlə artmaqdadır. Ötən illərdə keçəlləşmənin dəqiq səbəbləri məlum deyildi. Sonralar alimlər belə bir fikir irəli sürdülər ki, saçların güclü tökülməsi kişi cinsi hormonlarının-androgenlərin miqdarının artması ilə əlaqədardır. Saçların tökülməsi orqanizmdə vitaminlərin çatışmaması, mədə-bağırsaq yolunun, ya da sinir sisteminin pozulması nəticəsində də baş verir. İngilis alimləri bu yaxınlarda apardıqları araşdırmadan sonra belə bir nəticəyə gəliblər ki, ekologiyası və havası çirkli, atmosferi zəhərli maddələr zəngin olan, kimyəvi maddələrin çox istehsal olunduğu yerlərdə yaşayanların dazlaşma riski daha böyükdür.
Bu gün bütün dünyada saç tökülməsinin qarşısı 3 formada alınır. Birinci üsul lasyon müalicəsidir ki, bu müalicədən ölkəmizdə istifadə olunmur. Daimi olaraq lasyona bağlı yaşamaq olduqca əziyyətli olduğundan bu üsul elə də diqqət mərkəzində deyil. İkinci üsul mezoterapiya və plazma liftinqdir ki, bu üsul ölkəmizdə də ən geniş yayılmış üsuldur. Qalıcılığı və xəstəyə daha az problem yaratmağı baxımından bu üsula müraciət edənlər də çoxdur. Üçüncü üsul isə saç əkimidir. Hansı ki, bu üsul olduqca əziyyətli və xəstə tərəfindən əzablı bir proses hesab olunur.
Mezoterapiya üzrə ixtisaslaşmış həkim Sura Əlişovanın sözlərinə görə, mezoterapiya və plazmaliftinq prosedurları hazırda ən çox tətbiq olunan üsullardır. Qiymət baxımından elə də ucuz olmayan bu üsulla müalicənin effekti isə 90% hallarda müsbət nəticələnir. Prosedurların sayı saçdakı tökülmə dərəcəsinə görə müəyyən olunur. Plazmaliftinq zamanı isə xəstənin öz qanından hazırlanan plazma saç dibinə yedizdirilir. "Saç əkilməsi isə ən əziyyətli, üstəlik, müsbət effekt verib-verməyəcəyini də əvvəldən bilinməyən bir üsuldur. Saç soğanaqları bir növ baş dərisinə əkilir və tutan soğanaqlar saç olaraq uzanmağa davam edir".
Bu gün dünyanın müxtəlif ölkələrində saçların bərpası üçün əkmə və cərrahiyyə müdaxilə üsulundan istifadə olunmaqdadır. Bu zaman keçəlləşmə yerinə 2-3 tük follikulu yerləşmiş dəri sahəciyi transplantasiya olunur. Transplantasiya üçün yalnız pasiyentin öz tükləri istifadə olunmalıdır. Bu əməliyyat zərgər dəqiqliyi tələb edir. Doğrudur, bu üsullarla sıx, gur saça nail olmaq mümkün deyil, amma başın keçəlləşmiş hissəsi seyrək tüklərlə örtülür. Cərrahi metod olduqca bahalı prosedurdur. Əkilən saçlar 3 ay sonra çıxır. Həmsöhbətimiz bildirir ki, bu cür əkilən saçların sonradan tökülmə riski də var: "Saç soğanaqları və dəri xəstənin öz başından olsa belə, saçın tutmama riski də mövcuddur. Bu zaman müəyyən müddətdən sonra ikinci və üçüncü dəfə əkim edilir. Elə orqanizm var ki, o, ümumiyyətlə, bu üsulu qəbul etmir və dəfələrlə əkim olsa belə, tüklər tökülür. Eyni zamanda saç əkimi ciddi sağlamlıq müayinəsi tələb edir. Xəstəliyi olan insanlarda yaranın sağalması gec olur. İnfeksiya riski yüksəkdir. Saç əkilən insanlarda qan xəstəliyi olmamalı, qanın laxtalanması normada olmalıdır. Çünki qanama çox ola bilər. Əlbəttə, ciddi ürək problemi, infarkt keçirmiş insanlarda da bu cür əməliyyat etdirmək olmaz".