Yayın gəlməsi ilə uşaqlar arasında həşərat sancmaları, alergiya, günvurma və angina kimi mövsümi xəstəliklər çoxalıb. Milli.Az Regiolan TV-yə istinadən xəbər verir ki, bu xəstəliklər, daha çox valideynlərin səhlənkarlığı ucbatından baş verir. Belə ki, yay aylarında kiçik yaşlı uşaqların qida rasionlarında dəyişikliklər baş verir ki, bu da qida zəhərlənmələrinə yol açır. Əsasən, mövsümlə bağlı olan bu xəstəliklər uşaqlarda halsızlıqla müşahidə olunur.
Həkim Dürdanə Abdullayevanın sözlərinə görə, mövsüm başlanandan uşaqlar arasında əsasən, günvurma və zəhərlənmə halları daha çox müşahidə olunur.
Bu cür hallar xüsusən də 3-5 yaşlı uşaqlarda üstünlük təşkil edir. Həkimlər yay mövsümündə azyaşlı uşaqların qidalanmasına xüsusi diqqət ayrılmasını və isti havalarda günün altında az olmalarını tövsiyə edirlər.
Havaların isti keçməsi həzm problemi də yaradır. Buna görə də uşaqlar göyərti, meyvə, ayran və bu kimi həzmi asan olan qidalarla bəslənməli və çox yağlı qidalardan istifadə olunmamalıdır. Böyrək xəstəliyi olan uşaqlar isə havanın isti olduğu saatlarda sərin, kölgəli yerlərdə gəzdirilməlidir.
Mənbə: Milli.Az