Bu depressiyadan əziyyət çəkənlər bir qədər qapalı, bədbin, ümidsiz görünürlər. Mütəxəssislər distimiyanın müalicəsinin zəruri olduğunu qeyd edirlər. Əks halda pasient həm şəxsi, həm işgüzar həyatında, həm də orqanizmində ciddi problemlərlə üzləşəcək.
Psixiatr Ramil Rzayevin sözlərinə görə, distimiyanın yaranma ehtimalı depressiv insanlarda daha çoxdur:
"Belə insanların əsəb sisteminin fizioloji quruluşu bu xəstəliyin inkişafına şərait yaradır. Xəstələrdə beyində serotoninin yaranma prosesi pozulur. Serotonin isə insanın əhvalını yüksəldən hormondur. Yaxın insanların, ailə üzvlərinin dəstəyi olmadıqda, işdə və şəxsi həyatda uğursuzluqlar, yaxın adamını itirmək və başqa problemlər distimiyaya səbəb olur".O qeyd edib ki, distimiyanın dörd əsas variantı qəbul edilib - şəxsiyyətin depressiv pozuntusu, depressiv nevroz, nevrotik depressiya, xroniki təşviş depressiyası: Distimiyanın bütün formalarında depressiya üçün xarakterik olan əlamətlər var. Xəstələrdə vəziyyətlərindən asılı olaraq, xəstəliyin gedişatı zamanı depressiyanın ağır əlamətlərinə də rast gəlmək olar."Distimiyanın qurbanları bədbin görünür, onda olmayan xəstəliklərdən belə şikayət edir. Hər şey ona maraqsız və mənasız gəlir. İnsanlar bu vəziyyətdə həyatdan zövq ala bilmirlər. Onlar işləmək, nəsə etmək də istəmirlər. Tez-tez səhhətləri ilə bağlı şikayətlər etsələr də, heç bir müalicə üsuluna, həkimə inanmırlar. Həkimlər özləri də belə pasientlərlə işləmək istəmirlər. Ona görə ki, pasientlər onları suallarla bezdirir, qorxuları, uydurma xəstəlik əlamətləri ilə (ipoxondriya) yorurlar".
R.Rzayev bildirib ki, distimiyanın əlamətlərinə iştahanın və yuxunun pozulması, intim istəyin aşağı olması, bədbinlik, qapalılıq, ümidsizlik, iş qabiliyyətinin aşağı enməsi aiddir. Xəstələr tez-tez dərs oxumağın, işləməyin, ev işlərini görməyin əzabverici olduğunu deyirlər. Özlərini köməksiz və ümidsiz hiss edirlər.
Müsahibimizin dediyinə görə, distimiya uzun illər davam edə bilər. Belə insanlarla ünsiyyət maraqsız olur. Yaxınları belə onlardan soyuyur. Onlar söhbət zamanı hər şeydən şikayət edə bilərlər. Həm səhhətləri, həm şəxsi və işgüzar həyatları onları qane etmir. Onlar ünsiyyətdə olduğu insanları pisləməyə başlayır, onlar haqqında qeybət edirlər. Bu cür şəxslər əksər hallarda əhvalını qaldırmaq üçün spirtli içkilərə və narkotik vasitələrə əl atırlar.
Həkimin sözlərinə görə, distimiyanın erkən başlaması irsi amillərdən asılı olaraq ağır keçə bilər. Bu depressiyadan əziyyət çəkənlər arasında intihar edənlər də olur: "Distimiya zamanı tutmalar olur. Tutma zamanı xəstəliyin 11 əlamətindən heç olmasa 3-ü müşahidə olunur. Enerji potensialının və ya fəallığın enməsi, yuxusuzluq, özünəgüvənin aşağı düşməsi, diqqətin zəifləməsi, əvvəllər şəxsə məxsus olan intim hisslərin itməsi, emosional kövrəklik və ağlamağa meyl, iş qabiliyyətinin və peşə vərdişlərinin zəifləməsi, həyata pessimist yanaşma, ünsiyyətə meylin azalması, ümidsizlik və peşmançılıq hissi, tənhalığa meyl".
Onun dediyinə görə, hər əhval pozuntusunu distimiya adlandırmaq olmaz. Qeyd olunan tutma, o cümlədən təkrar tutmaların davamiyyəti iki ildən az olmamalıdır.
Mənbə: Ekspres.Az