Azərbaycanda çay həvəskarı olmayan, hər gün bir neçə stəkan çay içməyən yəqin ki, az adam tapılar. Çay “xəstələri” də var ki, hər gün evdə məhz samovar çayı içirlər. Amma çay da var, çay da var. Söhbət heç şübhəsiz ki, təbii çaylardan gedir. Qiyməti bir qədər baha olsa da, sağlamlığımız üçün təbii çay alıb içməyə, dadından ləzzət almağa dəyər.
Lakin son vaxtlaradək çaya münasibət də birmənalı deyildi. Məsələn, çayın insan orqanizminə zərərli olması barədə ictimaiyyət arasında müxtəlif fikirlər səsləndirilirdi. Xüsusən də, çayı qaynar içməyin insanın daxili orqanlarını zədələdiyi fikrində olanlar da var idi. Əlbəttə, bu fikirlərdə də həqiqət var. Məsələn, təbii olmayan, el dili ilə desək, “kraska” çaylar müxtəlif orqanlara mənfi təsir göstərir. Bundan başqa, çayı bir qədər soyudub içmək lazımdır ki, həm ləzzətini dadasan, həm də dilin-dodağın, mədən yanmaya.
Xərçənglə mübarizədədə çayın şəfası var
Türkiyədə aparılan bir araşdırma çay həvəskarlarını sevindirə bilər. Söhbət ondan gedir ki, aparılan uzun araşdırmalar nəticəsində müəyyənləşib ki, təbii çay heç də insan orqanizmi üçün zərərli deyil. Yəni, nə qədər içirsən iç. Nəinki zərərli deyil, hətta araşdırmalar nəticəsində məlum olub ki, çay artıq çəkidən xilas olmaqdan başlayaraq bir çox xəstəliklərlə mübarizədə, enerji dəstəyindən tutmuş stress azaltmağa qədər bir çox sahədə faydalıdır.
Qeyd edək ki, dünyada təbii sudan sonra ən çox içilən içki növü olan çayın müxtəlif formaları (ağ, yaşıl, qara, Çin çayı və s) var.
Günümüzün ən böyük bəlası olan xərçənglə mübarizədə də çayın şəfası var imiş. Belə ki, araşdırmalar nəticəsində məlum olub ki, yaşıl çayın bəzi növləri xərçəngə qarşı faydalıdır. Yaşıl çay sidik kisəsi, düz bağırsaq, nəfəs borusu, mədə xərçənginə yaxalanma riskini azaldır. Yaşıl çay artıq çəki ilə mübarizə, ümumiyyətlə, çəkiyə nəzarət baxımından da müsbət təsir göstərir.
Əsəbləşmişəm, bir tünd çay süz
Yəqin böyüklərdən eşitmiş, görmüş olarsınız; bir az yorulan, əsəbləşən kimi deyirlər ki, bizə bir tünd çay süz. Sən demə, bu, səbəbsiz deyilmiş. Belə ki, qara çay stressi azaltmağa yardımçı olur. Əgər siz də çox stresli bir işdə çalışırsınızsa, bir stəkan çay dadınıza çata bilər. Qara çay stress yaradan hormonun səviyyəsini aşağı salır. Bundan başqa, qara çayın bir başqa faydası isə qan təzyiqi ilə bağlıdır. Məlum olduğu kimi, stress artdıqca qan təzyiqi yüksəlir, infarkt və ya iflic riski artır. 6 ay boyunca davamlı qara çayın içilməsi ən ağır təzyiq xəstələri üçün belə faydalı imiş.
Qara çayın özəllikləri bununla bitmir. Belə ki, bu çay şəkər xəstəliyi üçün də faydalıdır. Çində aparılan bir araşdırmada qara çayın şəkəri aşağı saldığı məlum olub. Çində və Yaponiyada isə çay hətta şəkər xəstəliyinin müalicəsində istifadə edilir.
Amerikalı alimlərin araşdırması nəticəsində isə məlum olub ki, gün ərzində 3 və ya 4 stəkan çay içmək iflic riskini 20 faiz azaldır.
Çay ürəyinizin də güclü olmasına köməklik edir.
Yazdıqlarımız təbii çaylara aiddir
Artıq çəkidən əziyyət çəkirsinizsə, yaşıl çay için. Yaşıl çayın tərkibindəki maddələr, orqanizmdə artıq yağ yığılmasının qarşısını alır. Ancaq yaşıl çaya normadan artıq şəkər qatsanız o zaman bu faydasını itirər. Odur ki, yaşıl çayı şəkərsiz için.
Yaşıl çay gözlər üçün də faydalı sayılır. Belə ki, yaşıl çay digər orqanizmlər kimi gözünüzün də xəstəliklərə qarşı daha dözümlü olmasına kömək edir. Yaşıl çayın tərkibindəki maddələr gözün toxumalarına müsbət təsir göstərir.
Yaşıl çay diş və diş ətinin də, belə desək, dostudur. Yaşıl çayın tərkibindəki maddələr ağızdakı bakteriyaları məhv edir.
Ölkəmizdə o qədər də çox içilməyən ağ çay isə daha gənc görünməyinizə yardım edir. Qeyd edək ki, ağ çay Çinin Fujian əyalətində yetişdirilir.
Sonda bir daha qeyd edək ki, yazdıqlarımız təbii çaylara aiddir. Digər çayların isə faydasından çox zərəri var...
Mənbə:Milli.Az