12 min əhalisi olan Cəyirli, Qızılağac, Şəkili, Kürdşaban və Yenikənd kəndlərini birləşdirən avtomobil yolunun yenidən qurulması istiqamətində işlər görülür. Yol prezident İlham Əliyevin sərəncamı ilə Göyçay rayon İcra Hakimiyyətinə ayrılan 2,2 milyon manat vəsait hesabına çəkilir. Milli.Az El TV-yə istinadən xəbər verir ki, ümumi uzunluğu 17.6 kilometr, eni 6 metr olan yolun çəkilişi üçün əraziyə 10 müxtəlif təyinatlı texnika və 20-ə yaxın işçi qüvvəsi cəlb edilib. Yolda torpaq tarazlama işləri başa çatdırılıb, hazırda isə cınqıl daşın döşənməsi və asfaltlama işləri görülür. Bu günədək yolun 8.2 kilometrlik hissəsinə asfalt örtüyü döşənib. İşlərin yaxın vaxtlarda başa çatdırılması nəzərdə tutulur. Kənd sakinləri yeni yolun çəkilişinə görə razı qaldıqlarını bildirirlər.
Mənbə: Milli.Az