Onun sözlərinə görə, 2013-cü ildə 11 sosial dəstək mərkəzinə 2222 müraciət daxil edilib və onlardan 1017-si uşaq məsələləri ilə bağlı olub. Onun sözlərinə görə, 6900 nəfər mərkəzin təlim və müxtəlif xidmətlərindən istifadə ediblər: "16 erkən nikah faktı aşkarlanıb, 11-nin qarşısı alınıb. Erkən nikahların qarşısının alınması məqsədilə "Ailəyə məktub" aksiyası çərçivəsində 12139 ailəyə məktub paylanıb. 27 ailə barışdırılıb, 11 uşağın müəssisəyə düşməsinin qarşısı alınıb".
Komitə nümayəndəsi qeyd edib ki, hər bir regionun özünün daha qabarıq görünən problemləri var: "Məsələn, Zaqatala və Göygöl rayonlarında erkən nikahlar haqqında danışa bilmərik. Çünki bu zonanın insanları daha mütərəqqi insanlardır və onlar üçün övladlarının təhsili daha vacibdir, nəinki erkən nikah qurmaq. Amma digər zonalarda vəziyyət fərqlidir”.
Z. Sadıqova onu da bildirib ki, komitə hər zaman uşaqların internat evlərindən ailələrə verilməsinin tərəfdarıdır: “Lakin regionların hamısında bu cür xidmət sahələri olmadığı üçün valideynlər sağlamlıq imkanları məhdud olan uşaqları ilə məşğul olacaq kifayət qədər ixtisaslı adam və ya mütəxəssis tapa bilmirlər. Kadr çatışmazlığı ucbatından uşaqlar regionlardan şəhərə gətirilərək internat evlərinə verilir".
Mənbə: Milli.Az