Stomatoloq Zəlimxan Məmmədli bildirdi ki, hazırda Hepatit C virusu ən populyar xəstəliklərdən biridir: “Bu xəstəlik əsasən qanla keçir. Sözügedən virus diş çəkmək və digər əməliyyatlarda daha tez keçir. Bundan başqa, tatuirovka, öpüş vasitəsilə də keçən bir xəstəlikdir. Amma stomatoloji kabinetlərdə bu xəstəliklər daha tez yayılır.
Bəzi tibb işçiləri, çox təəssüf ki, nə pasterizasiya, nə sterilizasiya, nə də ki, dezinfeksiyanın hətta fərqini belə anlamırlar. Bu cür məsələlərə biganə yanaşıldığı üçün belə fəsadlar verir. Təbii ki, çox dəyərli məsuliyyətli stomatoloqlarımız da kifayət qədərdir. Amma eyni zamanda dediyim kateqoriyaya aid olanlar da var. Bu məsələdə onlar ittiham oluna bilərlər. Ümumiyyətlə, bizim insanlarda stomatologiyaya fobiya var. Xüsusilə də xəstəliklərdən qorxduqları üçün onlarda bu fobiya yaranır. Fikrimcə, insanlar arasında maarifləndirmə işi düzgün aparılmır. Bu sahədə çox ciddi maarifləndirmə işləri aparılmalıdır".Z.Məmmədlinin sözlərinə görə, xəstəliklərə yoluxmamaq üçün vətəndaşlarımız tələbkar olmalıdırlar: “İlk növbədə sterilizasiyanı tələb etməlidirlər. Həkimin davranışına, əllərinə, iş qaydasına fikir verməlidirlər. Bəzi halda ucuz stomatoloji kabinetlərə müraciətlər bu cür fəsadları yaradan ən ciddi səbəblərdi. Yəni ucuz və keyfiyyətli stomatoloji xidmət anlayışı yoxdur. Yüksək keyfiyyətli stomatoloji xidmət daha artıq maliyyə məsrəfi deməkdir. İnsanlarımız daha ucuz xidmət dalınca qaçanda bu cür fəsadlarla daha çox rastlaşırlar”.
Mənbə: Milli.Az