Azərbaycanda dövlət qeydiyyatına alınmayan, dövlət reyestrinə daxil edilməyən xarici ölkələrin qeyri-kommersiya təşkilatlarının filial və nümayəndəliklərinin fəaliyyəti qadağan ediləcək. Milli Məclisdən APA-ya verilən məlumata görə, bununla bağlı “Hüquqi şəxslərin dövlət qeydiyyatı və dövlət reyestri haqqında” qanunun 4.1-ci maddəsinə xüsusi əlavə edilir. Edilən əlavəyə görə, xarici dövlətlərin qeyri-kommersiya təşkilatlarının filial və ya nümayəndəliklərinin dövlət qeydiyyatına alınmadan və dövlət reyestrinə daxil edilmədən fəaliyyət göstərməsi qanunvericiliklə müəyyən edilmiş məsuliyyətə səbəb olacaq. Sənəd cari sessiya ərzində Milli Məclisin müzakirəsinə çıxarılacaq.
Mənbə: Lent.Az