Ədliyyə orqanlarında işləmək arzusunda olan hüquqşünaslar üçün avqustdan başlanmış sənəd qəbulu noyabrın 12-də başa çatır. Növbəti müsabiqə üzrə test imtahanı isə noyabrın 16-da keçiriləcək. Trend-in nazirliyin rəsmi saytına istinadən verdiyi məlumata görə, bu barədə Ədliyyə Nazirliyinin Müsabiqə Komissiyasından bildirilib.Şəffaflığın təmin edilməsi, o cümlədən yerli və beynəlxalq müşahidəçilərin tədbiri tam izləmələri məqsədilə imtahan bütün namizədlər üçün vahid auditoriyada - Azərbaycan Texniki Universitetinin idman sarayında, Bakı şəhəri, A.Sultanova küçəsi 5 ünvanında saat 10.00-da keçiriləcək. İmtahan yerinə getməyə kömək məqsədilə nazirliyin internet səhifəsində videoçarx yerləşdirilib.
Qaydalara əsasən, test imtahanının yekununa görə 55 və daha artıq bal toplamış namizədlər uğur qazanmış hesab olunurlar. Həmin namizədlərin zəruri sənədlərinin toplanması və yoxlanılması bu mərhələdən sonra həyata keçiriləcək və qanunvericiliklə müəyyən edilmiş tələblərə cavab verən şəxslər ikinci mərhələyə - söhbətə buraxılacaqlar.
Namizədlər "İmtahana buraxılış vərəqəsi"ni noyabrın 14-dən etibarən saat 9:00-dan 18:00-dək şəxsiyyət vəsiqəsini təqdim etməklə Ədliyyə Nazirliyinin inzibati binasından götürməlidirlər.Mənbə: Milli.Az