ABŞ-ın Aviasiya və Kosmik Tədqiqatlar Agentliyinin (NASA) Kepler orbital teleskopu Durna və Lira ulduz topalarının qovşağında Yerin "əkiz"ini aşkarlayıb. Yeni ekzoplanet ölçü, çəki və sıxlıq baxımından sanki Yerin təkrarıdır. Milli.Az Nature-a istinadən bildirir ki, əsas məqsədi ekzoplanetlər axtarışı olan Kepler orbital teleskopu kosmik fəzaya 2009-cu ilin mayında buraxılıb. Bu ilin mayında teleskopun fəaliyyətində problemlər yarandığından NASA onu geri qaytarmaq fikrindən vaz keçmişdi. Fəqət Kepler orbitdə olduğu zamanda o qədər çox məlumat toplayıb ki, həmin informasiyaların yerbəyer olunaraq təhlil edilməsinə illərlə vaxt gərəkdir. Yeni tapılmış ekzoplanetə "Kepler-78b" adı verilib. Havaydakı Honolulu və İsveçrədəki Cenevrə universitetlərinin alimləri isə bildiriblər ki, Kepler-78b planetinin çəkisi yerdən 1,8 dəfə, radiusu isə 1,2 dəfə böyükdür. Yeni ekzoplanetin sıxlığı 1 kub santimetrə 5,3 qram olduğundan Yerdən praktiki olaraq fərqlənmir. Kepler-78b-də insanlar yaşasaydı, orta ömür sürəyi ən azı 1000 il olardı. Çünki planet ulduzu ətrafında 9 günə tam dövr vurduğundan, bu ekzoplanetdə 1 il cəmi 9 günə bərabərdir.Amma elə həmin "mikroil" sayəsində ekzoplanetin səthində temperatur +1100 ilə +2700 dərəcə arasındadır. Honolulu Universitetinin professoru Endryu Hovardın başçılıq etdiyi qrupun hesablamalarını Cenevrə Universitetinin professoru Françesko Pepenin başçılıq etdiyi astronomlar qrupu təsdiqləyib. Onlar HARPS qurğusu vasitəsilə ekzoplanetin titrəyən spektrini ölçüblər.