Qarabağ Azadlıq Təşkilatının (QAT) təşəbbüsü, Azad Qarabağ Uğrunda Alyansın iştirakı ilə Türkiyənin Ankara şəhərində “Qarabağ Təbliğat Turu” çərçivəsində Qarabağ həqiqətlərinin Türkiyə ictimaiyyətinə çatdırılması məqsədilə bir sıra görüşlər keçirilib.
APA-nın Ankaraya ezam olunmuş əməkdaşının verdiyi xəbərə görə, öncə bir qrup Alyans üzvü Türkiyənin Daxili İşlər Nazirliyi aparatının rəhbəri Seyfulla Hacımüftəoğlu ilə görüşüblər. Görüşdə QAT sədri A.Nağı Dağlıq Qarabağ münaqişəsi barədə çıxış edib və bu sahədə Türkiyənin Azərbaycana dəstəyinin vacibliyi qeyd edib.
Türkiyənin hər zaman Azərbaycanın yanında olduğunu xatırladan S.Hacımüftəğlu isə qeyd edib ki, Qarabağ münaqişəsinin həllində də Türkiyə Azərbaycana istənilən dəstəyi göstərməyə hazırdır.
Sonra Alyans üzvləri Türkiyənin keçmiş daxili işlər naziri, Ordu millət vəkili İdris Naim Şahin və Türkiyə Qazilər Birliyinin başqanı Lokman Aylar ilə görüşüblər.
İ.N.Şahin Ermənistan-Azərbaycan, Dağlıq Qarabağ münaqişəsi haqqında danışaraq qeyd edib ki, ermənilərin Azərbaycan qarşı törətdiyi soyqırım və haqsızlıqlara lazımı qiymət verilməlidir: “Dağlıq Qarabağda, xüsusən də Xocalıda qardaşlarımıza qarşı törədilən vəhşiliklər heç bir insani xüsusiyyətlərə sığmır. Xocalıda axan qan həm də türk xalqının qanıdır”.
Keçmiş nazir onu da əlavə edib ki, Qarabağ probleminin həlli Türkiyə və Azərbaycanın güclənməsi və bütün sahələrdə əlaqələrin daha da genişləndirilməsindən asılıdır: “Azərbaycan dövləti Türkiyə dövlətinin, Azərbaycan xalqı Türkiyə xalqının qardaşıdır. İki dövlət arasında bu qardaşlığı daim yaşatmalıyıq. Türkiyə haqsızlığa, soyqırıma, ədalətsizliyə uğrayan Azərbaycanın yanındadır və həmişə də qardaş ölkəyə dəstək olacaq”.
Mənbə: APA.az