“Yer planetini siləcək olaylardan qaçmaq mümkün deyil”.
Qadin.Net publika.az-a istinadən xəbər verir ki, bu sözlər dünyaca məşhur fizik Stiven Hokinqin ölümündən əvvəl gələcəyə dair proqnozlarının arasında yer alıb.
Koronavirus pandemiyası yayıldıqdan sonra gələcəklə bağlı bir daha gündəmə gələn fikirlərdən ən çox səsləndirilənlər arasında Hokinqin ehtimalları üstünlük təşkil edir.
76 yaşında həyata gözünü yuman alim bildirib ki, planetimizin sonunu gətirəcək olaylar arasında asteroid toqquşması kimi kosmik hadisələrlə yanaşı, süni intellekt, iqlim dəyişikliyi, genetikası dəyişdirilmiş viruslar və nüvə müharibələri yer alıb.
Hokinq 2016-cı ildə BBC-yə müsahibəsində dünyada 1 il içində bir fəlakətin gerçəkləşmə ehtimalının çox az olduğunu demişdi: “Amma bu ehtimal geniş zaman dilimində artar və min, on min il kimi zaman dilimində, demək olar ki, dəqiq hala gələr. Bəşəriyyət bu zaman çərçivəsində qalaktikaya yayılmalıdır. Lakin qarşıdakı yüz il ərzində kosmosda özünə kifayət edəcək qədər texnologiyaya sahib ola bilməyəcəyik. Buna görə də çox diqqətli olmalıyıq”.
Alim süni intellektin yaratdığı fürsətlərdən xəbərdar olsa da, təhdidlərinə qarşı xəbərdarlıq etməyi unutmurdu. O, 2014-cü ildə BBC-yə müsahibəsində süni intellektin tam olaraq inkişaf etməsinin bəşəriyyətin sonunu gətirə biləcəyini bildirmişdi. Onun fikrincə, zəkalı robotların inkişaf etmiş formaları insanlardan daha üstün vəziyyətə gələ bilər.
S.Hokinq dünyadakı həyata dair ən böyük təhdidlərdən birinin iqlim dəyişikliyindən gələcəyini düşünürdü: “ABŞ-ın Paris İqlim Müqaviləsindən çıxması təşvişvericidir. Geriyə dönüşü olmayan nöqtəyə çox yaxınıq. Donald Trampın bu hərəkəti dünyanın 250 dərəcə istilikdə və turşu yağışlarının olduğu Veneraya bənzəməsinə gedən yolu aça bilər”.
Qeyd edək ki, Hokinq 14 mart 2018-ci ildə İngiltərədə vəfat edib.