Hazırda internetdən istifadə edən hər kəsin ən azından bir sosial şəbəkədə səhifəsi var. Hər kəs bu səhifələrdən müxtəlif məqsədlər üçün istifadə edir. Kimi ortaq maraq və düşüncələrə malik virtual dostlar axtarır, kimisi iş, kimisi isə öz sevgisini.
Bəs Bakı sakinləri virtual dünyanın yaratdığı imkanlardan yararlanıb orada sevgisini tapanlara necə baxır?
Milli.Az "ACT Azərbaycan"ın keçirdiyi sorğunun nəticələrini təqdim edir:
Rəyi öyrənilmiş paytaxt əhlinin, demək olar ki, yarısı (47 %) internetdə tanışlıqlara mənfi yanaşdığını bildirib. Bu məsələdə istər kişilər (48 %), istərsə də qadınlar (47 %) ortaq mövqedən çıxış edirlər. Müasir tanışlıq metodunu bəyənməyənlər, əsasən, 45-54 və 55-64 yaş aralığında olan respodentlərdir (hər biri ayrı ayrılıqda 71 %).
Sualın ürək-könül məsələsi olduğunu nəzərə alıb daha yumşaq yanaşanlar da yetəri qədərdir. Belə ki, 42 % respondent internetlə tanış olanlara neytal münasibət bəslədiyini bildirib. Bu fikirdə olanların böyük əksəriyyətini yeni nəslin nümayəndələri (18-24 yaş aralığı) təşkil edir (62 %).
Sevgi üçün məhdudiyyətlər tanımayanlar sorğuda cəmi 5 % səs toplayıblar. "Onlayn" sevgiyə müsbət baxanlar isə 25-34 yaş aralığında olan gənclərdir (8 %).
Sevgi-məhəbbət haqqında deyilmiş ən gözəl sözlərdən biri də Fransa yazıçısı Fransua de Laroşfuko məxsusdur: "Əsl məhəbbət xəyala bənzəyir; hamı onun haqqında danışır, lakin çox az adam onu görüb".
Sorğu 23-28 sentyabr tarixlərində Bakı şəhərində 400 respondent arasında telefon vasitəsilə həyata keçirilib. Sorğu nəticələrinin yanlışlıq həddi maksimum 4.9 %-dir
XƏBƏR LENTİ
