Sosial şəbəkələr istəsək də, istəməsək də gündəlik həyatımıza daxil olub. Sosial şəbəkələrdən istifadə elə bir həddə çatıb ki, bəziləri onun xəstəsinə çevrilib və həyatını onlarsız təsəvvür etmir. Bəziləri də hesab edir ki, Facebook, Twitter, Odnoklassniki.ru, Vkontakte.ru və digər sosial şəbəkələrdən istifadə işçilərin də qulluq vəzifələrini yerinə yetirməsinə mane olur. Təsadüfi deyil ki, artıq bir sıra böyük dünya şirkətləri və dövlət qurumları iş yerlərində sosial şəbəkələrdən istifadəyə qadağa qoyub.
Bəs bu vəziyyət Azərbaycanda necədir? Sosial şəbəkələrdən istifadə etməyə dövlət qurumlarında icazə verilirmi?
Məsələ ilə bağlı Modern.az saytı bəzi nazirliklər və dövlət qurumlarından bu suala cavab istəyib.
Əmək və Əhalinin Sosial Müdafiəsi Nazirliyinin İctimaiyyətlə əlaəqlər şöbəsinin müdiri Elman Babayev nazirlikdə işçilərin sosial şəbəkələrdən istifadəsinə hər hansı qadağanın qoyulmadığını bildirib.
“İşçilərdən sosial şəbəkələrdə səhifəsi olanlar var və bununla bağlı hər hansı məhdudiyyət mövcud deyil. Nazirliyin özünün də sosial şəbəkələrdə rəsmi səhifəsi mövcuddur”.
Bakı Nəqliyyat Agentliyinin mətbuat katibi Mais Ağayev etik davranış qaydalarında internetdən yalnız iş məqsədləri üçün istifadənin nəzərdə tutulduğunu deyib.
“Sosial şəbəkələrdən də yalnız işdə ehtiyac duyulan işçilər istifadə edir. Yəni şəxsi məqsədlər üçün yox, iş məqsədilə istifadə olunur”.
Gənclər və İdman Nazirliyinin mətbuat xidmətinin rəhbəri Səmayə Məmmədova bildirib ki, işçilərə sosial şəbəkələrdən istifadədə hər hansı qadağa qoyulmayıb.
Mədəniyyət və Turizm Nazirliyinin mətbuat katibi İntiqam Hümbətov da nazirlikdə işçilərin sosial şəbəkələrdən istifadəsinə hər hansı qadağanın qoyulmadığını bildirib.
“Kim sosial şəbəkədə qeydiyyatdan keçibsə, ondan istifadə də edə, baxa da bilər. Hazırda hər kəs istər öz telefonundan, istərsə də komputerindən sosial şəbəkələrə daxil ola bilər. Bunun üçün hər hansı bir qadağa yoxdur”.
Məsələ ilə bağlı daha bir neçə nazirliyə sorğu göndərsək də, cavab vermək istəmədilər.
Mirmahmud KAZIMOĞLU
Modern.az
XƏBƏR LENTİ
- ŞƏRHLƏR