Qadın voleybolçular arasında Avro-2015-in II təsnifat mərhələsinin oyunları başlandı. Apasport.az saytının məlumatına görə, Azərbaycan millisi 7-ci cəhdinə Bolqarıstanın paytaxtı Sofiyada start verəcək.
Faiq Qarayevin yetirmələri mərhələ adlamaq üçün ev sahibləri, Yunanıstan və Portuqaliya ilə münasibətinə aydınlıq gətirəcək. Azərbaycanla Bolqarıstan qrupun favoritləri hesab olunur. Düzdür, Balkan ölkəsinin millisi ilə son oyunlar Azərbaycan yığması üçün uğursuz alınıb, onlar komandamızın Avropa Olimpiya Təsnifat Turnirində də yolunda “qırmızı işıq” yandırmağı bacarıblar.
Lakin bu dəfə komandamızın revanş alacağı, yekunda birbaşa finala yüksələcəyi proqnozlaşdırılır. Çünki rəqib yeni baş məşqçi Vladimir Kuzyutkinin rəhbərliyi altında ilk rəsmi oyununa çıxacaq və demək olar ki, heyətdə də ciddi dəyişikliklər var. Bu, təmsilçimizin xeyrinə işləyə bilər.
Azərbaycan millisi isə Bakıda və Mariborda yaxşı təlim-məşq toplanışı keçdikdən sonra səfərə optimal heyətlə yollanıb. Odina Əliyeva və Valeriya Koretenko müxtəlif səbəblərdən komandada yer almasalar da, artıq onların layiqli əvəzləyiciləri var. Müvafiq olaraq, Yekaterina Jidkova, Oksana Kiselyova və ya Ceyran Əliyeva əsas heyətdə “döyüşə” atıla bilər. Hücum xəttimiz həmişəki kimi lider Natalya Məmmədovadan asılı olacaq. Onunla yanaşı, Anastasiya Qurbanova, Polina Rəhimova və Yana Ağayeva rəqibləri hər an gərginlikdə saxlamaq gücündədir.
Blokda da ciddi problemimiz yoxdur. Çünki son illərdə ölkə voleybolunun yetişdirdiyi yerli oyunçularımızdan Ayşən Abduləzimova yenə rəqiblərin həmlələrinin qarşısını almağa çalışacaq. Hazırda yaxşı formada olan “Lokomotiv”in blokçusuna bu işdə Kseniya Kovalenkonun kömək edəcəyi və ya əsas heyətdə onların bir-birlərini əvəzləyəcəyi gözləniləndir. Qarayevin son mövsümdə “Azərreyl”də heyətdə yer almayan, karyerasının son günlərini yaşayan Yelena Parxomenkonun da təcrübəsinə bel bağlayacağı istisna deyil.
Toppaylayıcılara gəlincə, komandamızın kapitanı Oksana Parxomenko, yaxud vitse-kapitanı Natəvan Qasımovanın hücumçularımıza və blokçularımıza lazımı dəstəyi verəcəyi sözsüzdür.
Bolqarıstanla müqayisədə Yunanıstan və Portuqaliyanın isə millimizə çətinlik yaşadacağı inandırıcı deyil. Çünki bu komandalar yığmamızla oyuna hələ təcrübə kimi baxırlar. Onlar üçün liderlərdən set almaq belə uğur hesab olunacaq.
Voleybolçularımız səfərdən 1 məğlubiyyətlə qayıtsa belə onu Bakıda keçiriləcək II dövrədə sığortalamaq gücündədirlər.
Bolqarıstan, Sofiya
22 may
17:30. Portuqaliya - Azərbaycan
20:00. Bolqarıstan - Yunanıstan
23 may
17:30. Azərbaycan - Yunanıstan
20:00. Portuqaliya - Bolqarıstan
24 may
17:30. Yunanıstan - Portuqaliya
20:00. Azərbaycan - Bolqarıstan
Azərbaycan, Bakı
29 may
16:00. Portuqaliya - Bolqarıstan
18:30. Azərbaycan - Yunanıstan
30 may
16:00. Bolqarıstan - Yunanıstan
18:30. Portuqaliya - Azərbaycan
31 may
16:00. Yunanıstan - Portuqaliya
18:30. Bolqarıstan - Azərbaycan
Qeyd edək ki, reqlamentə əsasən, seçmə mərhələlərdə 32 komanda 9 vəsiqənin taleyinə aydınlıq gətirəcək. Artıq ilk təsnifat mərhələsindən sonra 4 milli mübarizəni dayandırıb. II təsnifat mərhələsində qrup qalibləri birbaşa Hollandiya və Belçikanın ev sahibliyi edəcək final mərhələsinə yüksələcək. Qrupda ikinci olacaq millilər isə pley-offda münasibətlərinə aydınlıq gətirəcəklər.
Meydan sahibləri Belçika və Hollandiya, son Avropa çempionatının ilk “beşliyi”ndə yer alan Rusiya, Almaniya, Serbiya, Xorvatiya, həmçinin İtaliya (apennilər 6-cı olsalar da, Belçika çempionata ev sahibi kimi qatıldığından bu hüquqa yiyələnib – red.) artıq 16 komandanın mübarizə aparacağı yarışa vəsiqə qazanıb.
Mənbə:lent.az
XƏBƏR LENTİ
- ŞƏRHLƏR