Əziz Qadin.Netlilər, bugün sizə dünyanın ən çox ziyarət edilən, ən məşhur və ən zəngin muzeylərini təqdim edirəm. Muzeyə səyahət etməyi sevənlər üçün vacib məlumatlar yerləşdirəcəm. İnşAllah səfər etmiş olsanız öz təəssüratlarınızı bizimlə bölüşərsiniz.
Luvr muzeyi
Fransanın Paris şəhərində yerləşən Luvr muzeyində 300 mindən çox əsər var. Unutmamısınızsa bu muzey haqqında geniş xəbər təqdim etmişdim. Luvrda antik Misir, yunan, ərəb mədəniyyətlərindən tutmuş Leonardo Da Vinçi, Mikelancelo, Rembrandt kimi məşhur rəssamlara qədər – hər şeyə rast gəlmək olar. 14 girişi olan muzeyi tamamilə gəzmək üçün 3 gün vaxt lazımdır. Təkcə 2008-ci ildən 2010-cu ilə qədər hər il muzeyi 8.5 milyon insan ziyarət edib. 2011-ci ildə muzeyin ziyarətçilərinin sayı 8.8 milyona çatıb. Muzeyə giriş pulludur.
Vatikan muzeyi
1473-cü ildə Papa II Yuli tərəfindən əsası qoyulan Vatikan muzeyi hələ də dünyanın ən böyük muzeylərindən biridir, hətta birincisidir. Muzeydə əsasən Renesans dövrünə aid maraqlı əsərlər var. Məsələn: "Dədə Qorqud" dastanının ikinci əl yazması məhz bu muzeydə saxlanılır. Mikelanceloya aid “Sonuncu məhkəmə” adlı rəsm “Sistine Chapel” muzeyindədir. “Sistine Chapel” kimi bir çox muzeyi papalar üçün tikilən saraylarda qurulduğu üçün divarlar, döşəmələr, tavanlar sizi təəccübləndirəcək əl işləri ilə zəngindir. Vatikan muzeylərinin bəzilərinə pulsuz, bəzilərinə isə 5-10 avro ödəyərək daxil ola bilərsiniz.
Ermitaj muzeyi
Rusiyanın Sankt-Peterburq şəhərində yerləşən Ermitaj muzeyi kraliça II Katerina tərəfindən 1764-cü ildə əsası qoyulub. 5 binadan ibarət muzeyin 350 zalında 3 milyonadək eksponat sərgilənir. Ermitajda Azərbaycana aid bir çox metal sənəti nümunələri də var; XIX əsrin axırları Naxçıvandan tapılan VII əsrə aid 35,6 sm hündürlüyündəki fiqurda alimlərin fikrincə, Qafqaz Albaniyasının hökmdarı Cavanşir (638-670) təsvir edilib. Bundan başqa, Ermitajda Azərbaycan şairi Nizami Gəncəvinin "Xəmsə"sinin 1430-cu illərdə üzü köçürülmüş nadir nüsxəsi mühafizə olunur.
Britaniya muzeyi
İngiltərənin London şəhərindəki muzeydə dünyanın hər tərəfindən gətirilən antik əsərlər sərgilənir. Muzey 1753-cü ildə hazırlansa da, açılışı 1759-cu ildə edilib. Kitabxanasında 7 milyondan artıq kitab olan muzeydə 105 min əlyazma, təxminən 100 min xartiya və məktublar, 3 mindən çox papirus kağızı var. Muzeyə giriş pulsuzdur.
Metropoliten Sənət Muzeyi (Met)
Nyu-Yorkda yerləşən Metropoliten Sənət Muzeyi, ya da qısaca “Met” 2 milyondan çox əsərə ev sahibliyi edir. 1870-ci ildə yaranan muzey əvvəllər ayrı-ayrı adamların vəsaiti və zəngin iş adamlarının - Morqan, Rokfeller, Ceykob Rocers, Qoras Xevmeyerin könüllü ianələri hesabına fəaliyyət göstərib. Misir, yunan, Avropa, islam və yapon sənəti kimi kateqoriyalarda müxtəlif əsərlər görmək olar. Giriş üçün xüsusi qiymət yoxdur. Pulsuz və ya çox aşağı qiymətə muzeyi gəzmək mümkündür.
Misir muzeyi
Qahirədə yerləşən Misir muzeyi Qədim Misir mədəniyyətinə aid əşyaların satılmaması və oğurlanmaması üçün yaradılıb. 120 mindən çox əsərin toplandığı muzeydə Tutanhamonun məzarı və 9 mumiya nümayiş olunur. 2011-ci ilin yanvar ayında Misirdəki etiraz aksiyaları vaxtı muzeydən bəzi eksponatlar oğurlanmış, sonradan tapılaraq muzeyə qaytarılmışdı.
Prado muzeyi
İspaniyanın paytaxtı Madriddə əsası qoyulan Prado muzeyi fəaliyyətinə heykəl və rəsmlərin sərgiləndiyi qalereya kimi başlayıb. Muzeydə hal-hazırda 1300 sənət əsəri saxlanılır. Saxlanılan eksponatları üç yerə ayırmaq olar: məşhur rəssamların tabloları, tarixi heykəllər və qədim sikkə pullar. Dieqo Velaskes və Fransisko Qoyanın bir çox mühüm rəsm əsərləri burada sərgilənir. Muzeyə giriş turistlər üçün 12 evro, tələbə üçün 6 avrodur.
Reyksmüzyem
1800-cü ildə qurulan Reyksmüzyem Hollandiyanın milli muzeyidir. Ölkənin ən zəngin kitabxanasının da yerləşdiyi muzey 1808-ci ildə Napoleon Bonapardın qardaşı, Hollandiya kralı Luis Bonapardın əmri ilə Amsterdama köçürülüb. Muzeydə Rembrandtın “Gecə gözətçisi” və Van Qoqun əsərləri sərgilənir.
Uffizi qalereyası
Florensiyada yerləşən Uffizi Qalereyası Qərbi Avropanın ən populyar və qədim sənət muzeylərindəndir. İtalyan rəssam Sandro Bottiçellinin məşhur əsəri “Veneranın doğuluşu” ilə yanaşı muzeydə rəsm həvəskarları Mikelancelo, Da Vinçi, Rembrandt, Rafael Santi, Karavacconun əsərlərini də seyr edə bilərlər. Girişi 8-10 evro olan muzeyə girmək üçün ən sakit saatlarda belə azı 2-3 saat növbədə durmaq lazımdır.
Smitson İnstitutu
1846-cı ildə Vaşinqtonda qurulan muzey sahəsinə görə dünyanın ən böyük muzeyidir. Amerika Tarixi Muzeyi, Təbiət Tarixi Muzeyi, Amerika Hinduları Muzeyi kimi 19 fərqli muzey kompleksindən ibarət olan muzeydə 136 milyon əşya qorunur. 6,4 milyon əsərin elektron yayımlandığı muzeyə giriş pulsuzdur