Azərbaycanın ev sahibliyi etdiyi "Eurovision-2012" mahnı müsabiqəsinin final şousu İsveçin qələbəsi ilə başa çatdı. Səsvermə başlayandan sonadək İsveç öz üstünlüyünü qoruyub saxladı.
Sonda İsveç 372 xalla 1-ci yeri qazanıb. 2-ci yerdə Rusiya, 3-cü yerdə isə Serbiya qərarlaşıb.
Qalib, 57-ci "Eurovision" mahnı müsabiqəsində İsveç təmsilçisi Lorinin ifa etdiyi "Euphoria" mahnısı müsabiqənin ən sevilən mahnısı olub.
Lorinin əsl adı Lorine Zineb Noka Talhaouidir. Əslən mərakeşli olan Lorin İsveçin "İdol 2004" müsabiqəsindən populyarlıq qazanıb. İlk mahnısını 2005-ci ildə təqdim edib. Bir müddət televiziyada aparıcı olub. 2011-ci ildə "My Heart is Refusing Me" mahnısı ilə İsveçin milli seçimlərində iştirak edib. Lakin İsveçi Avropanın ən nüfuzlu mahnı müsabiqəsində təmsil etmək arzusu 2012-ci ildə reallaşıb.
Çıxışlar bitdikdən sonra müsabiqədə iştirak edən 42 ölkə ilə canlı bağlantı qurulub. Canlı bağlantılar zamanı ölkələrin təmsilçilərə verdikləri səslər elan edilib. Azərbaycandan səsləri "Eurovision 2010" təmsilçimiz Safura Əlizadə açıqlayıb. Belarusun səslərini 2007-ci ildə bu ölkəni təmsil edən Dmitriy Koldun, Fransadan nəticələri "Eurovision 2011" təmsilçisi Amauri Vassili, Rusiyanın səslərini isə məşhur aparıcı, model Oksana Fyodorova açıqlaylb.
Səsvermə zamanı Rumıniya, Avstriya, Belarus, Fransa , İsveçrə, Sloveniya, Xorvatiya, Niderland, Portuqaliya, İslandiya, İsveç, Norveç, Estoniya, Danimarka, Latviya, İspaniya, Finlandiya, İtaliya, Almaniya, Macarıstan, Azərbaycana heç bir xal verməyib.
Səsvermədə həm tamaşaçılar, həm də münsiflər iştirak edib. Səsvermədə peşəkar münsiflər heyəti (hər bir ölkədən musiqi sahəsində beş peşəkar) iştirak edir. Münsiflər və tamaşaçıların səsləri yarıbayarı toplanıb. Beləliklə, ümumi xal əldə olunub və ölkələrə verilib. Qalib ölkəyə müsabiqənin rəmzi olan "büllur mikrofon", həmçinin Azərbaycan bayrağı ilə bəzədilmiş mikrofon da hədiyyə edilib.
Azərbaycan isə ilk beşlikdə yer alıb. Təmsilçimiz Səbinə Babayeva toplanılan xalların sayına uyğun olaraq, 150 xalla dördüncü yerdə qərarlaşıb. Azərbaycana 12 xal Ukrayna, Malta, Türkiyə və Litva ölkələrindən gəlib.
Ümumilikdə müsabiqənin ilk onluğu isə belə sıralanıb:
1. İsveç
2. Rusiya
3. Serbiya
4. Azərbaycan
5. Albaniya
6. Estoniya
7. Almaniya
8. Türkiyə
9. İtaliya
10. İspaniya
Qalib ölkənin yarimfinal çıxışı:
P.S. - 22.05.2012-ci il tarixindən etibarən saytın ana səhifəsində, ölkə ərazisində müsabiqəni yayımlayan "İctimai" kanalın canlı yayımını birbaşa izləmək üçün keçid, tanıtım rəsmi əlavə olunmuşdur. Kanalın yayımı 27.05.2012-ci il saat 23:59-a qədər davam edəcək.
Xoş istirahətlər...