Sən gedirsən, söylə kimi
Köməyimə çağırım mən.
Necə tutum sən getdiyin
Hər izi mən,cığırı mən,
Getməyəsən!
***
Dağlarımı haraylayım
Yollarını kəssin sənin?!
Küləkləri səsləyimmi,
Yollarında əssin sənin,
Getməyəsən!
***
Buludlara yalvarımmı,
Yağış olub səpələnsin?!
Bəlkə dəniz coşub-daşsın,
Yollarına ləpələnsin,
Getməyəsən!
***
Öz eşqimlə dağlar kimi
Yollarını kəsərdim mən,
Nəfəsimlə küləklər tək
Yollarında əsərdim mən,
Getməyəsən!
Getməyəsən!