Yaşayıram , yox dünyadan xəbərim,
Sakit, səssiz ötüb keçir günlərim.
Bilmirəm ki, nədir xeyrim, zərərim,
Varlığımı sarıb sanki çən, duman,
Axı səni düşünürəm mən hər an.
Xəyaldadı çəkə-çəkə əzabı,
Arayıram min suala cavabı.
Məstəm sanki içməsəm də şərabı,
Ayılmıram desələr də qalx, oyan,
Axı səni düşünürəm mən hər an.
Dolanıram bəzən başı havalı,
Görcək çaşır dost-yaxınım bu halı.
Dindirməyə vurğunluqdan kar, lalı,
Cəhd səyləri boşa gedir çox zaman,
Axı səni düşünürəm mən hər an.
Hissim, duyğum korlaşıbdır elə bil,
Yadırğayıb söz-kəlməyə dodaq-dil.
Diksinmərəm göy kişnəyə lap qəfil
Ruhum uçub köç eyləyib canımdan
Axı səni düşünürəm mən hər an.