Çətir
Çətirin altında bir qadın gördüm,
Ədayla-işvəylə yolla gedirdi.
Yanında bir kişi çətiri tutub,
Baxaraq qadına söhbət edirdi.
***
Mən isə arxadan gəlirdim səssiz,
Qadının başının üstündə çətir.
Kişiysə islanır yağan yağışdan,
Damlalar üzünə, başına səpir.
***
Yarandı başımda belə bir sual,
Görəsən hansıdır onlardan üstün?
Qadınmı, gedərək çətir altında,
Kişimi, islanmış üst-başı bütün?
***
Sözsüz ki, kişinin diqqəti bəlli,
Qadından islanmış üzünü gizlər.
Qadını naz edib baxaraq ona,
Təbəssüm edərək, məhəbbət gözlər.
***
Yağışdan qorunan ədalı qadın,
Diqqətə layiqdir sanar özünü.
Bəs görən şəxsini düşünən zaman,
İslanmış simadan çəkərmi gözün?
***
Mən isə onlara diqqət edirdim,
Nə kişi, nə qadın, nə eşq ətiri?
Qoyaraq kənara mən hər bir şeyi
Düşündüm islanan qara çətiri.
***
Görəsən olmasa islanmış çətir,
Yaramaz bir işə qadın ədası.
Kişinin yaş olmuş siması heçdir,
Çətirsiz nədir ki, bunun faydası?
Fərid Abdullah Rəşid