Dünya düzəlməz
Necə ki, yalan yol alıb yeriyir,
Düzəlməz bu dünya, vallah düzəlməz.
Pislər çox yaşayır, yaxşılar ölür,
Düzəlməz bu dünya, vallah düzəlməz.
***
Harda böyük-kiçik yeri bilinmir,
Elin yaxşısı, yamanı seçilmir,
Ər oğlu ərlərə qiymət verilmir,
Dözülməz bu dünya, vallah dözülməz.
***
Dardadı Vaqifin, Xanın məzarı,
Əgər biz azad etməsək onları,
Heç ruhları bağışlarmı bizləri?
Düzəlməz bu dünya, vallah düzəlməz.
***
Un qarışıq, suyu bulanıqdırsa,
Yoğuranla bişirən xəbisdisə,
Halallıq, düzlük olmaz o çörəkdə.
Düzəlməz bu dünya, vallah düzəlməz.
***
Yaxşıya, pisə qiymət qoyulmasa,
Böyük, kiçiyin yeri bilinməsə,
Ulduz göydə, çiçək yerdə olmasa,
Düzəlməz bu dünya, vallah düzəlməz.
***
Gülün xoşuna gəlir bülbül səsi,
Bülbül istəməz heç vaxtı qəfəsi,
Bilinmirsə hər dərdin öz davası,
Düzəlməz bu dünya, vallah düzəlməz.
***
İlanlar sevmir əzəldən yarpızı
Bir yerdə otlamırsa qurdla quzu,
Gəlin sevmirsə qaynı, baldızı,
Düzəlməz bu dünya, vallah düzəlməz.
***
Samvel Azərbaycan xalq şairidir,
Yoxsa bizim Əli Kərimin adı.
Alınmaz Ələsgərin məzarı
Düzəlməz bu dünya, vallah düzəlməz.
***
Tülkü ağadırsa aslan üstündə,
Dost dosta dayaq deyilsə, pis gündə,
Nərin ayağında vurulsa kündə,
Düzəlməz bu dünya, vallah düzəlməz.
***
Doğma vətənimizi alıb yağı,
Düşmən oylağıdı aranı, dağı.
Alınmırsa Ələsgərin məzarı,
Dözülməz bu dünya, vallah dözülməz.
***
Hərənin bir arzusu var ürəkdə,
Olmasa halallıq duzda, çörəkdə,
Lazımsa tərlana sarın köməyi
Düzəlməz bu dünya, vallah düzəlməz.
***
Kəsirlər başları fürsət olanda,
Qısnarlar divara rüşvət alanda.
Yalan, məkr ürəklərə yol tapanda,
Dözülməz bu dünya, vallah dözülməz.
***
Uşağın atadan yoxsa xəbəri,
Düz olmaz onun işi, əməli.
Eləsinin dəyməz xalqa köməyi,
Düzəlməz bu dünya, vallah düzəlməz.
***
Necə ki, Nəbi, Babək nəvələri,
Əldə silah minmirlər köhlənləri,
Qana qəltan etmirlər düşmənləri
Düzəlməz bu dünya, vallah düzəlməz.
***
Həmişə bahara deyirlər solmaz,
Yovşan əksən ondan çəmənzar olmaz,
Necə ki, yaxşı qiymətin almaz,
Düzəlməz bu dünya, vallah düzəlməz.
***
Sən götürsən gücün çatmayan daşı,
Məyus edərsən dostu, həm də qardaşı.
Əgər namərd atırsa mərdə daşı,
Düzəlməz bu dünya, vallah düzəlməz.
***
Əgər harın, nadan özünü öysə,
Aqillər yanında gözünü döysə,
Qocanın, zəifin qəlbinə dəysə,
Düzəlməz bu dünya, vallah düzəlməz.
***
Əl tutun, əl tutmaq Əlidən qalıb,
Əl tutan özünü bilərsə qalib,
Harınlar özün saysa yenilməz,
Düzəlməz bu dünya, vallah düzəlməz.
***
Allah insanları çəkir sınağa,
Ona güc verib, gətirir qınağa.
Şər olursa xeyrin üstündə ağa,
Düzəlməz bu dünya, vallah düzəlməz.
***
Əgər düz olmasa cığırın, izin,
Yerisən yıxılarsan, gülməz üzün.
Səmimi olmasa ürəyin, sözün,
Düzəlməz bu dünya, vallah düzəlməz.
***
Necə ki, hiylə, yalan minir ata,
Sərkərdə Babək aldanır Sumbata,
Qoç Koroğlu ki, inanır Həmzəyə,
Düzəlməz bu dünya, vallah düzəlməz.
***
Sevgiyə güc olmaz, sədaqət istə,
Hər dağdələn olmaz Fərhadtək usta.
Namərdə yalvarma, çevrilmə dosta,
Düzəlməz bu dünya, vallah düzəlməz.
***
Kişini saydırır çörəyi, duzu,
Namusun qoruyur gəlini, qızı.
Bilinməsə hər kəsin işi, sözü,
Dözülməz bu dünya, vallah dözülməz.
***
Çaya çatmamış çıxarma başmağı,
Qıza şərəf verər onun üz ağı.
Qadın yersiz yerə vursa yaşmağı,
Düzəlməz bu dünya, vallah düzəlməz.
***
İgid el-obaya arxalanmasa,
Atalar da oğluna güvənməsə,
Bülbül öz gülünü qoxlamasa,
Düzəlməz bu dünya, vallah düzəlməz.
***
İnsan gərək xeyrə, şərə yaraya,
Qohum-əqrabanı, dostu araya,
Təhrif edib ağ deyirsə qaraya,
Düzəlməz bu dünya, vallah düzəlməz.
***
Sevənlər çox yaxşı bilər qaydanı,
Belə qısqanclıqdan gələn faydanı,
Onlar unutsalar əhdü-peymanı,
Düzəlməz bu dünya, vallah düzəlməz.
***
Elidir insanın arxa-köməyi,
Evin bəzəyidir onun qonağı,
Kişinin olmasa halal uşağı,
Düzəlməz bu dünya, vallah düzəlməz.
***
Dardadırsa Qoç Əlyarın məzarı,
Ora düşmürsə ərlərin güzarı,
Azad olmursa Mirinin məzarı,
Düzəlməz bu dünya, vallah düzəlməz.
***
Kişilər görmüşəm ürəyigeniş,
Onlar büdrəməsin, görməsin yeniş.
Yaxşılar almasa təşəkkür, alqış,
Düzəlməz bu dünya, vallah düzəlməz.
***
Bilinmirsə böyük-kiçiyin yeri,
Şeytanın çuğlayan artarsa varı,
Zindana atsalar ər oğlu əri,
Düzəlməz bu dünya, vallah düzəlməz.
***
Oğullar tez ölüb sıradan çıxır,
Atalar, analar qalıb dərd çəkir,
Necə ki, vətəndə düşmən turp əkir,
Düzəlməz bu dünya, vallah düzəlməz.
***
Hər zaman baş verir vulkan, zəlzələ,
Alimlər bu sirri açmayıb hələ,
Necə ki, namərd mərdə qurur tələ,
Düzəlməz bu dünya, vallah düzəlməz.
***
Əsil, kökümüzü unuduruq biz,
Nə gecə bilirik, nə də ki, gündüz,
Doğma vətən gedib gülmür üzümüz
Düzəlməz bu dünya, vallah düzəlməz.
***
Dardadı igid Həcərin məzarı,
Mir Sədi, Hacı Qaraman ocağı.
Azad etməsək ocağı, məzarı,
Düzəlməz bu dünya, vallah düzəlməz.
***
Necə ki, dardadı ər oğlu ərlər,
«Tülkü bəy!» Azaddı, tutulub nərər,
Neçə ki, meydanda yoxdu Nəbilər,
Düzəlməz bu dünya, vallah düzəlməz.
***
Düşmən aldı Şuşanı, Laçını,
Oğullar itirdi qol-qıçını.
Almasaq torpaqların hamısını,
Düzəlməz bu dünya, vallah düzəlməz.
***
Biz qoşuruq Sayat Novaya dastan,
Düşməni ayıra bilmirdik dostdan.
Necə ki, qəfəsdə bağlıdı aslan,
Düzəlməz bu dünya, vallah düzəlməz.
***
Qubadlı, Cəbrayıl, Füzuli hanı?
Yoxdursa Şuşa, Xankəndi, Xocalı,
Düşmən tutdu Kəlbəcər, Zəngilan, Ağdamı,
Düzəlməz bu dünya, vallah düzəlməz.
***
Neçə ki, nadanlar olublar ağa,
Alimi, şairi qoyurlar lağa,
Bülbül cəhcəhinə gülür qurbağa,
Düzəlməz bu dünya, vallah düzəlməz
***
Əşiri göynədir İsa bulağı
Düşmənə qalıb Vaqif oylağı,
Cıdırdan gəlmirsə atın sorağı,
Ora olubsa erməni oylağı,
Eşşək çapırsa cıdırımda yağı,
Düzəlməz bu dünya, vallah düzəlməz.
Əşir Bəşiroğlu