Gəlin var nəs deyəndi,
Gəlin var pis deyəndi.
Gəlinimə qurban olum,
Oğlumu istəyəndi.
***
Yar, gül taxım telinə,
Əlin vurub belinə.
Qoy sağ olsun qaynata,
Hörmət elər gəlinə.
***
Ay gəlin, sənə qurban,
Dolan gəl dərə, qurban.
Qardaş evi yaxşıdır,
Yenə də ərə qurban.
***
Gəlin, diləkli gəlin.
Ceyran ürəkli gəlin.
Xəmir yoğur, çörək yap,
Ay şir biləkli gəlin.
***
Ay gəlin, gözüm gəlin.
İşlərəm özüm gəlin.
Neyləsin qaynanası,
Tənbəldir bizim gəlin.
***
Ay gəlin, çiçək gəlin,
Gözləri göyçək gəlin.
Sən mənə bax, mən sənə,
Bu yoldan keçək gəlin.
***
Gəlin bir aş bişirdi.
Gözündə yaş bişirdi.
Bütün günü işlədi,
Elə bil daş bişirdi.
***
Qızıldır dişin sənin,
Müşküldür işin sənin.
Niyə səntək gözəli,
Sevməyir kişin, gəlin?
***
Oğlum, əldə saz gətir,
İşvə apar, naz gətir.
Qışda adaxlanmısan,
Gəlinimi yazda gətir.
***
Dur ayağa qız, gəlin,
Tellərini düz, gəlin.
Toyçulara gəl yaxın,
Düş ortaya süz, gəlin.