Sənin eşqin uca, həsrətin uca,
Könül sirdaşısan məhəbbətimin.
Vüsal zirvəsindən möhnətin uca,
Sən yol yoldaşısan məhəbbətimin.
***
Sən mənim sultanım, mən sənə kölə,
O şahlıq taxtına sahibsən hələ...
Mən elə bilirdim bu atəş ilə
Bir nəhəg daşısan məhəbbətimin.
***
Taleyi kəm mənəm, zaman içində,
Çırpınıb qalmışam güman içində.
Bir ömür qayığı tufan içində,
Səməndər quşusan məhəbbətimin.
***
Ay Eldar, eşqimə baş əyim – dedim,
Eşqimin tacına mələyim dedim.
Sənə iki gözüm, bəbəyim dedim,
Gördüm göz yaşısan məhəbbətimin…
Müəllif: Eldar İsmayıl.