***
Ömrüm sevgidənmi belə uzandı?
Sənə ölməyim də azdı, neyləyim?!
Neyləyim, qismətim Tanrı yazandı,
Yazan da beləcə yazdı, neyləyim?!
***
Qar yağdı ürəyə, kipriyə, telə,
Bir dolu budağam, yapış sirkələ.
Saldığın dərdlərə dözürəm hələ,
Deyirəm, bəlkə də nazdı, neyləyim?!
***
Dərdindən divanə oldum, gəlmədin,
Alışdım, sızladım, soldum, gəlmədin.
Özümdən didərgin oldum, gəlmədin,
Xəyalım yolunu azdı, neyləyim?!
***
Yenə sətir-sətir uydurur qələm,
Nə göylərdəyəm, nə yerlərdəyəm.
Bu necə ömürdür, vallah bilmirəm,
Çağladı sel kimi, yazdı, neyləyim?!