Bayatılar
126 906
41
Mən aşiq yollara mən
Gül tökdüm yollara mən,
Söylədilər gəlirsən
Göz qoydum yollara mən.
Mən aşiq canım oğlumun
Canımın qanı oğlumun,
Mənə dərman nə gərək
Verin ətrini oğlumun.
Mən aşiq xəstə canım
Sızlayır xəstə canım,
Balama xəbər verin
Tək ondadır dərmanım.
Mən aşiq dağlar ağlar
Dağlar buludlar ağlar,
Balalara qıymayın
Yanar, analar ağlar.
Mən aşiq yalan dünya
Talandın yaman dünya,
Səni mən çox sevsəm də
Yalansan, yalan dünya!
Mən aşiq söz yarası
Sağalmaz söz yarası,
Qılınc yarası baldı
Zəhərdir söz yarası.
Mən aşiq yalan dünya
Dönüb dolanan dünya,
Məni yaşatdın, sağ ol
Məndə gerçək o, dünya.
Mən aşiq dolu könlüm
Dolu, yaralı könlüm,
Qəribsən bu yerlərdə
Gedəsən hara könlüm.
Mən aşiq ağla ürək
Ağla rahatla ürək,
Yükün boyundan böyük
Halın yamandı ürək.
Mən aşiq dolur gözlər
Qəlb yanır dolur gözlər,
Bilsə belə gəlməzsən
Bu gözlər yenə gözlər.
22.12.2011
XƏBƏR LENTİ
- ŞƏRHLƏR