Qadin.NET / Hamilə ruhi xəstə

Hamilə ruhi xəstə

Hamilə ruhi xəstə

 "Ruhi xəstə"

 Onun irsən, doğuşdan ruhi xəstə olduğunu hamı bilirdi. Anası həm onu, həm də xəstə atasını xəstəxanaya verməyib, evdə qayğılarına qalırdı. Bir tibb bacısı kimi əlindən gələni onların xoşbəxtliyi üçün edir, onlara hamilik etməkdən vaz keçmirdi. Elə indi də qızının bu halında - hamiləliyində təslim olmur.

"Məqalənin qəhrəmanı" həm ruhi xəstə, həm də geyiminə baxmayan bir qızdır. 1983-cü il təvəllüdlü bu qıza kim "tamah saldı", onun günahına girib bir ehtirasa qurban etdi, hamilə qoydu?... Bu sualı onu ilk gördüyümdə özüm-özümə verdim və səbəbkarı, doğulacaq uşağın atasın lənətləməyə bilmədim düzü...

Fəridə çox baxımsız, geyimindən "cin hürkən", həm də ruhi xəstə idi. Ona tamah salan yəqin ondan da pis xəstədir! Kirli paltarları üst-üstə, zövqsüz geyinər, saçları daim pırtlaşıq olardı. Allah keçsin bu təsvirimdən və heç kəsə belə bir müsibət göstərməsin, ona gülmək, sizi onun halına güldürmək yox, sadəcə onu təsəvvür etmənizi istədim... Yanından keçənlərə sataşar, gülər, uşaqları qorxuzar, ona sataşanlara isə daş da atardı... Anası yazıq, neçə insanla üz-göz olur, camaata başa salırdı ki, "sataşmayın, Allahınız olsun, onu dəlixanaya aparmasınlar". Amma hamını başa salmaq olurdumu?... Bu qızı təsvir edəcək bir foto da tapa bilmədim... z şəklini isə qoya bilmərəm! Axı indi ana olmağa hazırlaşır bu həyatı belə dərk etməyən ruhi xəstə qız...

 "Kimlərə qaldı dünya?" 

 Anasını iynə vurdurmaq bəhanəsi ilə gördüm. İlk sualım onu özündən çıxardı. Cavab vermək belə istəmədi. Uzaqlaşmaq istədim. Qadın göz yaşı içində idi..."Nəylə kömək edəcəksən məgər? Mən körpəyə qıya bilmərəm. Atasını (belə demək olarsa) ittiham edib məhkəməyə versək, pulla canını qurtatacaq. Bu bədbəxtin başına elə oyun açıblar ki, onun əməlini ancaq uşaq doğulsa, DNT analizi ilə sübut edə bilərik. Qızımın halı da ki, göz qabağında... Uşağı götürmədik, o da pulla günahını yuyacağına söz verib.. Hələ pul da verib yalvardı ki, uşağı saldıraq, eləmədim. Uşaq nə cür doğulacaq, nə olacaq aqibəti, Allah bilir". Atasının kim olduğunu demədi... Qadın seçimini naəlac da olsa etmişdi... Uşaq dünyaya gəlincə səbr etməkdən və pulu almaqdan başqa əlacı da yox idi...

Hamilə ruhi xəstə

İndi ata qayğısını maddi təminat əvəz edəcəkdi. Bu uşaq atasız doğulacaq yəqin ki... Hələ ruhi xəstə olmayacağı, sağlam doğulacağı da məlum deyil. Pul, pul, pul... Pul dünyası kimlərə qaldı gör?!.

"Hamilə ruhi xəstə"

 İndi küçədə qarnı dəbərmiş, altı ayıq bu hamilə ruhi xəstəyə baxanların bəzisini də məni də narahat edən suallar narahat edir. "Atası kimdir, necə edib bu əclaflığı? Uşaq necə doğulacaq, onu hansı aqibət gözləyir? Aldıqları pulla evini təmir edən çarəsiz ana bu uşaqla (nəvəsi ilə) cəmiyyət içinə necə çıxacaq?" Suallar, suallar... Həyətdə hamilə ruhi xəstə bir qadın dolaşır... Suallar isə başımda tüğyan edir. Nə edə bilərəm ki? Sadəcə bu suallar tək mənim üçün çoxdur, ağır yükdür... Etiraf edim ki, gördüyün pisliklərə qarşı aciz olmaq çox çətindir. Əgər vicdanın, ruhun varsa, sən bu cür bəlaya göz yuma bilmirsən. Baxa da bilmirsən.

Hamilə ruhi xəstə

"Səbr... Hara kimi?"

 Uşağın doğulmasını, doğulduqdan sonra "atasının" maddi təminatını gözləyən ruhi xəstə bir qız anası... Səbr edir... Dözür... O, qızının halından daha utanmır... Onu bu hala salanın kimliyi deməsə də sanki bütün aləmə qızının timsalında "Dəli mənim qızım deyil, xəstə o deyil, cəmiyyət xəstədir, ondan da pis xəstələr var" deyə səssizcə car çəkir... Sözlə yox, sadəcə qızına dikələn baxışlarla... Fəridə yenə də küçələrdə gəzir, hamilədir, ruhi xəstədir... Analıq nə olduğun anlayırmı? O özünə nə verə bilir ki, bu doğulacaq məsuma da nə verəcək?... Səbr... Nə vaxtadək?... Axı sonluğun heç cür xeyirli olma ehtimalı yoxdur. Ən yaxşı halda körpə sağlam dünyaya gəlsə də, onun taleyini düşünmək belə çətindir. Allah rəhm etsin. Barı sağlam olsun, özünə gün ağlaya biləcək bir ağılda, düşüncədə olsun... Bəlkə də bir dahi doğulacaq, bəlkə də bir alim. Amma ata-ana sevgisi bilməyəcəyi yəqindir! Həyatda daim "gözdəndüşmə" biri kimi nəzərlərin təqibində böyüyəcəyi yəqindir. Daha yaza bilmirəm... Gözlərim də, qəlbim də qan ağlayır. Allahdan xeyirli nəsibini diləmək, Allahdan hamımızı belə müsibətdən hifz eləməsini diləməkdən başqa heç nəyə gücüm çatmır.

27 dekabr 2013
GO BACK