Əminəm ki, bir çoxları kimi siz də Salvador Dalinin eyni zamanda gözəl və təkrarolunmaz zərgər ustası olduğundan xəbərsizsiniz. O, təkcə qeyri-adi rəsm əsərləri ilə deyil, həm də inanılmaz gözəl zinət əşyaları hazırlayırdı. Dali deyirdi ki, əgər ideal rəssam olmaq istəyirsənsə, fırçanızla qızıl yaratmağı bacarmalısınız. Salvador Dali rəssam, dizayner və zərgər idi.
Qeyd edim ki, özündən sonra heç də az olmayan zərgərlik nümunələri qoyub getmişdir. Hər biri öz qeyri-adiliyi ilə seçilən, bu fərqli dünyanın mükəmməlliyini aşılayan zinət əşyalarını miras qoymuşdur. Onun ev muzeyinə virtual da olsa, artıq səyahət etmişik. Bilirik ki, dünyaya fərqli pəncərədən baxmağa üstünlük verən rəssam idi.
Brilliant qaşlarla bəzədilmiş bu qızıl əşyada Madonnanı təsvir edib.
1985-ci ildə kitabı işıq üzü görən məşhur tənqidçi B.Kartlic Salvador Dalini 20-ci əsrin dahi rəssam zərgəri adlandırmışdı.
1953-cu ildə hazırladığı döyünən ürək. Bəli, düz bildiniz. Bu yaqut daşlarla bəzədilmiş ürək, həqiqətən, insan ürəyi ritmində döyünür.
Salvador Dalinin zinət əşyalarının sərgisi 1971-ci ildə baş tutmuşdu. Lakin əksər insanlar bu gözəlliklərə dəyər verə bilmədilər. Zaman keçdikcə bu istedadın və bacarığın qarşısında susurlar. İnanılmaz və dərin məna gizləyən zərgərlik məhsulları hər zaman diqqət mərkəzindədir.
Gördüyünüz bütün bu zinət əşyaları Salvador Dalinin ev muzeyində, yəni İspaniyada yerləşən Fiqeras muzeyində saxlanılır.