Uzunömürlülüyün sirri
Hamı çox yaşamaq istəyir. Amma necə? Bir televiziya proqramında uzun ömürlülərin yaşam sirlərini izlədim. Mənə ən çox maraqlı olan onların bir ortaq nöqtəsi oldu: hərəkət və sağlam qida.
105 yaşlı nənənin dedikləri: "Ay bala, heç bir sirrim yoxdur, mən həmişə dağda-döşdə çalışmışam, yediyim yağ-bal olub, inək südü içmişəm. Ən çox yediyim balıq və göy-göyərti olub. Biz əti qızardıb yeməmişik, həmişə qaynadıb yemişik. Bir də çalışıb əsəbiləşməmişəm, kişi nə deyib, necə deyib, onu da eləmişəm. İnsanın ömrünün uzanmasının səbəblərindən biri də sevgidir. Əgər ailədə sevgi varsa, bir-birini başa düşmək varsa, ömür də uzanır. Xoşbəxt olmuşam həmişə, bizim ailədə heç vaxt söz-söhbət olmazdı, can deyib can eşitmişəm".
Ümumiyyətlə, qəbul edilən qida itirlimiş enerjiyə bərabər olmalıdır. Qəbul etdiyimiz qida itirdiyimiz enerjidən çox olmamalıdır. Çox hərəkət etmək lazımdır. İndi çoxumuz bitki yağından istifadə edirik, bu da çox doğru deyil, itirdiyimiz enerjiyə görə bitki yağı ilə yanaşı, təmiz kərə yağından da istifadə etmək lazımdır. Orqanizmin inkişafı üçün mütləq hərəkət etməliyik. Tez həzm olunan qidalardan uzaq durmaq lazımdır. Hazır qidalardan, siqaretdən, spirtli içkilərdən uzaq olun.
Ağır yeməkləri səhər, nisbətən yüngül yeməyi günorta, axşama isə lap az və yüngül yemək gərəkdir. Meyvə-tərəvəzdən çox istifadə edin. Dərmanlardan uzaq olun. Bir də ən əsası, yuxu rejiminə diqqət edilməlidir. Günəşlə yatıb, günəşlə qalxan çox yaşayar. Stressdən uzaq durun, çalışın soyuqqanlı olun.
Xeyirxahlıq da uzunömürlülüyə səbəb olur. Həmişə hesab edilirdi ki, qadınlar kişilərdən uzunömürlüdürlər. Amma indi qadınların da kişilər kimi siqaret çəkməsi onların da ömrünün qısalmasına səbəb olur.
Çox yaşamaq istəyirsinizsə bunları unutmayın:
1. Aktiv həyat tərzi keçirin, çalışın çox hərəkət edin.
2. Qanda xolesterinin miqdarını həmişə normada saxlayın.
3. Qan təzyiqinə nəzarət edin. Yüksək qan təzyiqi sakit ölüm deməkdir.
4. Tütündən imtina edin. Onun tüstüsündən də uzaq olun.
5. Düzgün qidalanın. Xüsusi pəhriz saxlayın.
6. Sevgi ilə yaşayın, sevin, sevilin.
Çalışıb televizordan və kompüterdan uzaq olun. Sağlam həyat tərzi keçirin. Pozitiv düşünün, hər şeyə yaxşı baxın, həyəcandan uzaq olun. Mənfi enerjidən qaçın. Allaha təşəkkür edin.
Hər kim 100 il yaşamasa, günah onun özündədir.