Bütün insanları bağlayan bir neçə ünsür vardır. Bunlardan biri və hətta deyərdim ki, birincisi məhz xoşbəxt olmaq istəyidir. Bu, hamımızı birləşdirən ortaq bir cəhətimizdir. İndi biri gəlsə və bizə "Xoşbəxt olmaq üçün sənə nə lazımdır?" deyə sual versə, hər kəs əlinin çatmadığı, ona ulduzlar qədər uzaq olan bir məqamı deyəcək. Halbuki, içində olduğumuz xoşbəxtliklərin fərqində belə deyilik. Bir söz vardır: "Sənin indi şikayətləndiyin həyat bəlkə də başqalarının arzu etdiyi həyatdır!". Bu, doğurdan da belədir. Biz nələrə nail olduğumuzun və nə qədər xoşbəxt olduğumuzun fərqində olmayan varlıqlarıq.
Yaşadığımız cəmiyyətdə xoşbəxtlik çətin əldə olunan dəyərlərlə assosiasiya olunur. Əslində isə xoşbəxt olmaq üçün nə milyonçu ər, nə növbənöv geyimlər, nə də bahalı kosmetika lazımdır. Adi şeylərə diqqət yetirməklə də xoşbəxt olmaq mümkündür. Gəlin bunların bir neçəsi ilə tanış olaq.
1.Heç vaxt tək qalmayın. Ətrafınızdakı insanlarla əlaqə saxlayın. Rəfiqənizgilə gedin. O sizə gəlsin. Uşağınızı bağçadan atası yox, məhz siz özünüz gətirin. Yoldaşınızla vaxt keçirin. Sevdiklərinizə olduğundan daha çox vaxt ayırmağa çalışın.
2.İşinizi sevin.Doğrudur, indi işlə təmin olunmaq çox çətindir. Amma bir halda ki, siz bu işlə məşğulsunuz, onu sevməlisiniz. Buna nail olmaq o qədər də çətin deyil.
3.Özünüzə fikir verin. Gözucu olsa da dəb tendensiyalarını izləyin. Tez-tez vanna qəbul edin. Üzünüzə, saçlarınıza fikir verin. Vaxtınız olduqca salona gedərək saçlarınızın rəngini və ya formasını dəyişin. Bu sizdə yüksək əhval-ruhiyyə yaradacaq. Əmin olun!
4.Həddən artıq həssas olmayın."Başqaları nə düşünər" deyə beyninizi boş yerə yormayın. Bəlkə də sizin düşündüyünüz o başqaları heç sizin mənfilərinizi hələ heç görməyib də. Başqalarının fikrindən asılı yaşamaq dəhşətdir!
5.Bağışlamağı bacarın .Özünüzü də, ətrafınızdakıları da. Bütün insanlar zaman-zaman səhv edirlər və unutmayın ki, hər kəsin yeni bir şans haqqı var.
6.Sevin.Hisslərinizin qarşılıqlı olmasına o qədər də aludə olmadan insanları, təbiəti sevsəniz və bu hissi dəyərləndirsəniz çox xoşbəxt ola bilərsiniz.
7.Qarşınıza məqsəd qoyun. Lakin ilk öncə nə istədiyinizi qərarlaşdırın və bu məqsədə bütün gücünüzü səfərbər edərək nail olmağa çalışın.
8.Sevinməyi bacarın! Günəşli hava, rəngli şarlar belə sizi sevindirməlidir. Bu sizin yetərindən daha da xoşbəxt olmağınıza yardımçı olacaqdır.
9.Gülümsəyin!Axı bizim həyatımızın məqsədi yalnız xoşbəxt olmağımızdır. Gülümsəmək həyatımızın məqsədinə çatmağımıza daha çox yardımçı olaacqdır!
Sonda hər birinizə hətta xırda məqamlarda belə xoşbəxt olmağı arzu edirəm, əziz xanımlar.