Rəfiqəm 9 aylıq hamilədir, artıq doğuma sayılı günləri qalıb. Zəng edib əhvalını soruşanda “Artıq ikimiz də doğuşa hazırıq” cavabını aldım. “İkimiz kimdir?” – soruşdum. “Anar da doğuşda iştirak edəcək, o da bunu istəyir” – dedi. Düzü, təəccübləndim və onu fikrindən daşındırmaq istədim. Çünki mən kişilərin doğuşda iştirakının tərəfdarı deyiləm.
Son zamanlar bütün dünyada doğuşa girən kişilərin sayı artır. Artıq atalığa namizədlər əllərində kamera və fotoaparatla o ana şahidlik edir. Yaxşı, bəs kişinin doğuşa şahidlik etməsi doğrudurmu? Tibb dünyası bunu müzakirə edir. Gəlin, biz də öz fikirlərimizi bölüşək.
Bir qisim insanlar bu suala “bəli” cavabı verir. Doğuşda iştirak etsinlər, çünki:
- Bu an çox önəmlidir, buna sahid olsunlar.
- Doğuşu kişi də paylaşmalıdır.
- Ər-arvad arasındakı əlaqə daha da güclənir.
- Doğuş daha asan keçir, yəni qadın psixoloji cəhətdən özünü tək hiss etmir.
Qapıda gözləsinlər, çünki:
- Özlərini itirirlər, ürəkləri gedir.
- Seks həyatına və xanımıyla əlaqələrinə mənfi təsir edir.
- Həkimlərin işini çətinləşdirirlər.
Bəzi qadınlar doğuş zamanı həyat yoldaşının yanında olmasını arzulayırlar. Kişilərin onların əlini tutmasını, ağrını paylaşmasını arzu edirlər. Bu zaman özlərini daha rahat hiss edəcəklərini, xoşbəxtliklərini bölüşəcəklərini qeyd edirlər. Qadınların bir hissəsi isə kişilərin onların çəkdikləri ağrını görərək “onun qədrini daha çöx biləcəyinə” ümid edirlər. Çox uşağı olan və daha bir uşağa sahib olmaq istəməyən qadınlar da kişilərin bu ağrılı prosesə şahid olduğu zaman daha bir uşaq arzulamayacağını düşünürlər.
Bir qisim qadınlar isə digər həmcinslərindən fərqli olaraq həyat yoldaşlarının doğuşda iştirakını istəmirlər. Ağrı çəkən zaman “Ərimi belə görmək istəmirəm” deyən qadınlar da var. Doğuş zamanı “Daxili orqanlarımı görmənə gərək yoxdur” deyərək həyat yoldaşını döğum otağından çıxartdıranlar da az deyil.
Həkimlər doğuşda iştirak edəcək kişilərə əvvəlcədən bəzi təlimatların verilməsinin vacibliyini qeyd edirlər. Atalığa namizəd lazımi məlumatları almasa, bu, doğuş zamanı mənfi təsirlər yarada bilər. Məsələn, ana sancı çəkən zaman kişi bundan təsirlənərək həkimə müdaxilə edə bilər. Əgər atada bəzi xəstəliklər varsa, bu zaman həkimin onun doğuşda iştirakına “yox” demək haqqı da var. Çünki doğuş zamanı keçirdiyi qorxu və həyəcan onun sağlamlığına ziyan vura bilər.
Həkimlərin böyük bir hissəsi isə kişilərin qapıda gözləməsinin tərəfdarıdır. Özü də əgər dünyaya ilk övlad gəlirsə, müdaxilə etmək lazım gəldiyi zaman kişilər ciddi problemlər yarada bilər.
Əziz xanımlar, bəs siz necə, həyat yoldaşlarınızın doğuş zamanı yanınızda olmasını istərdinizmi?