Tərkibi:
6 ədəd yumurta
5 stəkan un
2 stəkan şəkər tozu
4 x/q bal
2 paçka qabartma tozu
200 qram kərə yağı
2 paçka vanil
Kremi üçün:
4 stəkan süd
4 stəkan şəkər tozu
4 ədəd yumurta
12 x/q un
600 qram kərə yağı
3 paçka vanil
Hazırlanması:
Əvvəlcə kremi haırlayırıq. Göstərilən ərzaqların hamısını, yağdan başqa qarışdırıb orta dərəcədə odun üzərində bişiririk.
Hazır kütləni soyumağa qoyuruq. Xəmiri hazırlayırıq. Bunun üçün bizə su hamamı lazım olacaq. İri qazana su töküb qaynadırıq və xəmir hazırlayacağımız qabı qazanın ağzına yerləşdiririk. Qaba balı, yağı, şəkər tozunu əlavə edib, şəkər əriyənədək gözləyirik.
Yumurtanı kənarda çalıb asta-asta bu qarışığa əlavə edirik və 2-3 dəqiqə gözləyib odun üzərindən götürürük.
Dərhal qabartma tozunu və unu əlavə edib qarışdırırıq və xəmiri soyumağa qoyuruq.
Xəmir soyuduqdan sonra nazik yayıb sobanın listinə qoyuruq və bir neçə yerdən çəngəllə deşdikləyirik ki, köpüb qalxmasın.
Bütün layları bu cür bişirib soyuduruq. Sonra üst-üstə qoyub arasına hazırladığımız bişmiş kremdən çəkirik.
Sonda tortu zövqə görə bəzəyirik.
