Hamiləlikdə rahat yuxu əhəmiyyətli olduğu qədər də çətindir. Hamiləliyin ilk aylarında əksər xanımların rəngarəng və çox rahat yuxusu olur. Aylar bir-birini əvəz etdikcə günü-gündən böyüyən qarın rahat yatış formasını seçməyə mane olur. Kimisi hamiləlikdən əvvəl üz üstdə yatırdısa artıq bu sevimli yatış formasına 9 ay ərzində vida etməli olur. Araşdırmalara görə yuxusuzluq problemi hər hamilədə fərqli aylara təsadüf edir. Kimində 5-ci, 6-cı aylara rast gəlirsə, başqa bir hamilədə yuxusuzluq 7-ci, 8-ci aylardan başlayır. Lakin hansı ayda olmasından aslı olmayaraq yuxusuzluqdan əziyyət çəkən hamilə xanımlar üçün bir neçə məsləhət təqdim etmək istəyirəm. Onlara riayət etsəniz rahat yuxunuza yenidən qovuşacaqsınız.
1. Gündəlik vərdişlərinizə sadiq qalın. Yuxu saatınızı qəti qaçırmayın. Bir gün erkən yatıb, sabahsı gün gec yatmayın. Hər gün eyni saatda yatağınıza girin.
2. Sol tərəfə yatmağa öyrəşin. Sol tərəfə yatış hər bir hamiləyə vacibdir. Belə ki, bu yatış formasında qan dövranınız daha yaxşı olar və körpənizə lazımı oksigen çatdırmış olarsınız. Bundan əlavə əl və ayaqlarınızdakı şişlər də çəkilmiş olar. Təbii ki, sağ tərəfə yatmağınızda heç bir qəbahət yoxdur. Hansı sizin üçün daha rahatdırsa onu seçin. Seçiminizi edərkən körpənizi də düşünməyi unutmayın.
3. Yuxunuz qaçdığında-tavana baxmaq, ya da yataqda sağa-sola fırlanmaq əvəzinə qalxıb evin içində bir az gəzişməyiniz, kitab oxumağınız və ya həzin musiqi dinləməyiniz daha məqsədə uyğundur. Özünüzü çətinliklərə salmayın. Unutmayın ən vacibi sizin və körpənizin rahatlığıdır.
4. Narahatlıqdan uzaq olun. Yuxusuzluğun ən böyük səbəblərindən biri doğum və ya analıq haqqında beyninizdə dolaşan saysız-hesabsız düşüncələrdir. Unutmayın ki, gec ya da tez körpəniz dünyaya gələcək və bu növ fikirlərlə beyninizi yormağa gərək yoxdur. Gələcəklə bağlı inamlı və hüzurlu olun. Hər şer zamanla öz yerini tutur.
5. Yatağınızda müxtəlif sərtlikdə və ya yumuşaqlıqda bir neçə yastıq olsun. Özünüz üçün ən rahat dəstəyi istədiyiniz yastıqla yaradın. Bu rahatlıq hissi hər gün dəyişə bildiyi üçün yanınızda birdən çox yastıq saxlamaqda fayda var. Əgər yastıqlarla rahatlıq tapa bilmirsizsə hamilələr üçün nəzərdə tutulmuş xüsusi yastıqlardan istifadə edə bilərsiz. O sizə hamiləlik zamanı rahat gecə yuxusu bəxş edə bilər. Eyni zamanda süd vermə zamanı da əvəzolunmaz dəstəkçi rolunu oynaya bilər. Bəzi analar həmin yastıqlardan oturmaq vərdişini yeni öyrənmiş körpələrinin təhlükəsizliyi üçün də istifadə edirlər.
6. İdman etmək hamilə olmayanlar üçün vacib olduğu kimi, hamilələr üçün də vacibdir. Lakin hamiləlikdən əvvəl idman vərdişiniz yoxdursa, hamiləlik zamanı bədəninizi əlavə yükə salmamaqda fayda var. Hamiləlikdə idman eyni zamanda rahat yuxu təminatçısıdır. Edəcəyiniz hərəkət ardıcıllığını həkiminizlə birlikdə planlaşdırın və yuxu saatına yaxın vaxt ərzində qəti idmanla məşğul olmayın.
7. Yataq paltarlarınızı diqqətli seçin. Bel və ya sinə hissəsində sərt düymə olan, ya da sıxan paltarlardan, tərlədən parçalardan uzaq durun. Təbii parçalardan tikilmiş geniş gecəliklərdən istifadə edin. Bu eyni zamanda günlük geyimlərinizə də aiddir.
8. Normal şərtlər altında mədəni yoran qidalardan xüsusilə hamiləlik dövründə uzaq durmalısız. Qızarmış və ya yağlı yeməklərdən, həddindən artıq istiotlu, qazlı içkilərdən, kafeindən və şokoladdan mümkün olduğu qədər uzaq durun. Yuxunu qaçıran qəhvə, çay, kola kimi məhsulları nahardan sonra və gecə qəbul etməyin. Mümkünsə yatmazdan əvvəl yemək yeməyin. Daha doğrusu yeməkdən dərhal sonra yatmayın.
9. Gecə aclıq hissi ilə oyansanız-yemək isitmək əvəzinə sağlam qidalardan yararlanmağınız daha yaxşıdır. Bu qaynadılmış yumurta, meyvə və ya kraker ola bilər. Çox yeməməkdə də fayda var. Çünki yedikdən sonar yenidən yatağa qayıdacaqsınız bu isə mədənizə qədərindən çox yük verəcək.
10. Xüsusilə 6-ci aydan sonra- bəzi hamilələr xoruldadıqlarından və ya nəfəs darlığından şikayət edirlər. Bu şikayətlərin aradan qalxması üçün kürəyinizi və başınızı yüksəyə qoymağa çalışın. Yatmazdan əvvəl ilıq duş almağın rahat yuxu üçün faydası böyükdür.