Körpənin ana bətnində tərpənişləri nə zaman və necə hiss edilməlidir?
Dölün bətndə hərəkət etməsi artıq 7-ci həftədən başlayır. Lakin ana bu hərəkətləri daha sonrakı zamanlarda hiss edə bilir. Bu o zaman baş verir ki, döl artıq böyüyür və uşaqlıq divarına toxunduqca hiss edilir. Körpənin hərəkətləri onun normal inkişaf etdiyinin ilk göstəricilərindəndir. Gün ərzində müşahidə edilən aktiv hərəkət körpənin normal vəziyyətindən xəbər verir. Ancaq dölün 12 saat ərzində tərpənməməsi artıq həyəcanlı hal hesab edilir.
Körpə hansı tezliklə hərəkət etməlidr?
18-20-ci həftələrdə uşağın hərəkət etməsini ola bilsin ki, qadın hər gün hiss etməsin. Ancaq 30-cu həftədən sonra gün ərzində hərəkətlər çox sayda hiss edilməlidir. Körpə bir neçə vaxt sakit vəziyyətdə qala bilər. Daha sonra yenidən hərəkətlər aktivləşə bilər. 32-ci həftdən doğuşa qədər zamanda hərəkətlər azala bilər. Lakin bu zaman intensivlik artır. III trimestrdə qadına körpənin hərəkətlərini nəarət etmək məsləhət görülür. Adətən bu hərəkətlər gün ərzində 10 dəfədən az olmamalıdır.
Hansı daha yaxşıdır - tez-tez hərəkət və ya nadir hərəkət?
Adətən deyilir ki, həddən artıq aktiv tərpənişlər hipoksiya (oksigen çatışmazlığı) əlaməti hesab edilir. Lakin mütəxəssislər bunu qəbul etmir. Körpənin 30-cu həftədən sonra gün ərzində 10 dəfədən az və zəif hərəkət etməsi təhlükəli hesab edilə bilər. Bu cür hal baş verərsə mütləq həkim müayinəsinə getmək lazımdır.
Körpənin tərpənişlərini qadın hansı dövrdə hiss etməlidir?
Orta statistikaya görə əksər qadınlar ilk hamiləlikdə bu hərəkətləri 20-ci həftədən hiss etməyə başlayır.Təkrar hamiləliyi olan qadınlarda isə daha erkən – 18-ci həftədən hiss etmək mümkündür. Tərpənişləri hiss etmə individual xarakter daşıyır. Bu qadının həssaslığından və bədən quruluşundan asılı ola bilər. (arıq xanımlar bunu daha tez-hətta 13-14-cü həftədə də hiss edə bilər, kök xanımlar isə 20-ci həftədən sonra)
Dölün tərpənişləri nəyə bənzəyir?
Hərəkətlər yüngül təpiklər və ya fırlanmalar kimi hiss edilə bilər. Sanki qarının içərisində nə isə fırlanır. Körpənin ilk tərpənişi yüngül qıdıqlanma kimi və ya bağırsaqlarda olan qaz kimi hiss edilə bilər. Körpənin tərpənişlərini zamanla daha aydın hiss etmək mümkün olur. Hətta kənardan baxdıqda körpənin ayağının təzyiqi ilə qarın divarının qabardığını da görmək mümkündür. III trimestrdə bəzən hərəkətlər ritmik sıçrayışlar kimi müşahidə edilir-bu zaman körpə ana bətnində hıçqırır.
Bütün hamilə olan “Qadın-net”lilərə rahat və sağlam doğuş arzulayıram!!!