Nəzakət
Mənim adım Nəzakətdi,
Amma "Nazzı" deyirlər.
Dərsə getmək istəyirəm,
"Yaşın azdı" deyirlər.
(Qəşəm İsabəyli)
Yumurta
Nə olsun canımız var,
Canlı ki sayılmırıq.
Canlanmaq yuxusundan
Çoxumuz ayılmırıq.
Görməyə gözümüz yox,
Danışmağa dilimiz...
Ağ... sarı... çil-çil... qonur...
Adi yumurtayıq biz.
(Qəşəm İsabəyli)
Ay qış
Ay qış nə tez gedirsən,
Yağdırmadan qar bizə.
Bəs nə gətirəcəkdir
Gələndə bahar bizə?
(Qəşəm İsabəyli)
Nədir?
-Göy nədir?
-Dayağımız.
-Yer nədir?
-Ayağımız.
-Biz kimik?
-Sabahımız.
(Qəşəm İsabəyli)
Ovçu
Babam quşu uçurdur ki,
Vursun göyün üzündə;
Babam bir ovçudur ki,
Quş yayınmaz gözündən.
(Qəşəm İsabəyli)
Üç kişi
Babam təkdi,
Atam təkdi,
Təkəm mən;
Tək-Allahdı,
Tək-Dünyadı,
Tək-Vətən.
Babam deyir:
-"3" ki var,
Tək rəqəmdi;
Bizim "3"-ün
Fərqi odur ki;
Cəmdi.
(Qəşəm İsabəyli)
Qoruq
-Bax, bu gördüyün dağın,
Döşü tamam moruqdu.
Amma gedə bilmədik...
-Niyə?
-Çünki qoruqdu!
-Belə də qoruq olar,
Harda görünübdü bu?!
-Qonur ayı yaradıb
Bu gördüyün qoruğu.
Deyir ki, qoy yetişsin
Sonra yeyək moruğu.
(Zahid Xəlil)