Biz həmin xoşbəxt ölkələrdən biriyik ki, ilin 4 fəslini olduğu kimi yaşayırıq. Artıq yaz fəsli gəlir və günəş şüaları tezliklə hər yanı isidəcək. Odur ki, dolabdan eynəkləri çıxarma vaxtı gəlib çatıb. Əgər keçən yay aldığınız eynək modeli sizi qane etmirsə, o zaman dizaynerlərin bu ilin tendensiyasına uyğun olaraq hazırladığı eynək modellərini sizə təqdim etmək istəyirəm. Həm də sadalanacaq məlumatlardan yararlanaraq üz quruluşunuza uyğun modeli də öyrənmiş olacaqsınız. Bununla da siz özünüzə təkcə yay ayı üçün "oyuncaq" yox, həm də çoxfunksiyalı aksessuar əldə etmiş olacaqsınız. Qeyd etmək lazımdır ki, qadınların çoxu heç gözündə problemi olmasa belə şıq görünmək üçün eynəklərdən istifadə edir. Eynək seçən zaman onun gözəlliyi ilə yanaşı rahat olması da önəmlidir.
1. İlk növbədə burun yastıqcıqlarına fikir vermək lazımdır. Onlar burnu çox sıxmamalıdır. Çünki burun yastıqları sonradan burnun üzərində heç də xoşa gəlməyən izlər qoya bilər. Ən yaxşısı yumşaq silikonlu olanları seçməkdir.
2. Digər əsas komponenti eynəyin qulağa bərkidilən hissələri təşkil edir. Onun uzunluğu tamamilə çərçivəsindən qulaq seyvanının arxasına keçən qədər olmalıdır. Qulaqcıqlar qulağa təzyiq etməməlidir. Çərçivə mütləq rahat olmalı və hətta uzun müddət istifadə zamanı belə heç bir narahatlıq yaratmamalıdır.
Rahat olması ilə yanaşı, həm günəş, həm də optik eynəklər üz quruluşuna uyğun olmalıdır. Burda məsələ təkcə sizin tərzinizdən getmir. Taxılan eynək sizin qüsurlarınızı korrektə edə və ya sizə çox çirkin görünüş də verə bilər. Ona görə də eynəklərinizi çox dəqiq seçin.
Beləliklə, görək dizaynerlər 2014-cü ilə hansı çərçivədən baxırlar?!
Dairəvi çərçivəli eynəklər
2014-cü ilin yaz-yay kolleksiyasında dominant mövqedə olan modelləri dairəvi eynəklər təşkil edəcək. Rəngli şüşələrdən hazırlanmış eynəklər həm çərçivəsiz, həm də qalın çərçivəli hazırlanıb.
Missoninin bu eynək kolleksiyası Leqonun konstruktur hissəsinə bənzəyir.
Jonathan Sonunders 2014 yaz-yay kolleksiyası "Buratino" nağılındakı Bazilio adlı pişiyin eynəyini xatırladır.
Prenn kiçik bir qızın gəlincik eynəyinə bənzəyir.
Pişik gözü eynəklər
Bir çox xanımların üstünlük verdiyi pişik gözlü modellər 2014-cu ildə də dizaynerlərin hazırladığı kolleksiyalarda ön sıralardadır.
Damir Doma Modellero 80-cı illərin tərzini xatırladır.
Versace həmişə olduğu kimi möhtəşəm kolleksiya təqdim edir.
Kiçik formalar
Köhnə dəbli kiçik gözlü eynəklərin qarşısından nostalji hissləri yaşayaraq təbəssümsüz keçməmək mümkün deyil. Burberry Prorsum və Rochas markaları oval çərçivəli eynəkləri yenidən bu ilin tendensiyasına uyğun hazırlamağı bacarmışlar.
P.S. Əgər yorulmadınızsa, o zaman daha bir neçə eynək modeli təqdim etmək istərdim.
Gucci və Miu Miu kolleksiyasında hazırlanmış eynəklər müasir və cəlbedici hədiyyə ola bilər.
Klassik çərçivəli lüks detallı Bvlgari eynəkləri azad və işgüzar xanımlar üçün nəzərdə tutulub. Dior isə bu il Dior Demoiselle seriya eynəklərini təqdim edir. Dəqiq konturlu pastel rəngli və parlaq detallar "Kəpənək" siluetini xatırladır. İncə və nazlı xaımlar üçün nəzərdə tutulub.