Utancaqlıq və özünəinamsızlıq hər bir insana aid edilə bilər. Bəzən bu xüsusiyyətlər insana mənfi təsir göstərir. Utancaqlıq üzündən bəzən insan öz şəxsi həyatını nizama sala bilmir. Onu maraqlandıran insanla ünsiyyət qura bilmir. Düzdür, insanın həyasız və arsız olması mənfi xüsusiyyətdir və zəhlə tökür.
Özünəinamsızlıq isə insanın karyera qurmasına mane olur. Bu iki xüsusiyyəti dəf etmək üçün insana bir xeyli vaxt lazım olur. İndi görək insan özünəinamlı olmağı necə bərpa edib yarada bilər:
1 - Birinci yol odur ki, insan "öz qınından" çıxaraq cəmiyyət içərisinə çıxsın. Ona maraqlı insanlarla tanış olmağa çalışsın. Məsələn, evdən çıxırsa qonşulara "salam" versin. Əvvəlcə qəribə görsənə bilər. Lakin sonradan nə qədər insana təkan verəcəyi aşkar olacaqdır.
Məsələn, siz dükana gedib hansısa bir şey haqqında soruşa bilərsiniz, hətta hansısa bir malı götürüb baxa bilərsiniz. Yaxud yoldan keçən bir şəxsdən yolu soruşa bilərsiz. Görəcəksiz ki, siz insanlarla ünsiyyət qura bilirsiz.
2 - Öz xarici görünüşünüzə əl gəzdirin. Zahiri görüşünüz özünəinamsızlıq əlaməti olmasın. Qara və boz geyimlərdən çıxın, açıq rəngli paltarlar geyinin. Bunun üçün bahalı və brend geyinməyə ehtiyac yoxdur. Səliqəli və qənaətcil halda da nail olmaq mümkündür.
3 - Bu məsələni həll etmək üçün məmləkətimizdə kurslar, treninqlər vardır. Ora yazıla bilər və daxili utancaqlıq, qərarsızlıq və özünəinamsızlığınıza qalib gəlmək üçün daha çox maariflənə və praktiki məşğələlər edə bilərsiniz.
4. Çalışın daha çox böyük və səs-küylü yerlərdə iştirak edəsiniz. Yəni izdihamlı kütlə arasında olmaq sizə faydalı ola bilər. Bəzən lap adamayovuşmayan olsanız belə, bu cür məclislərdə kimsə sizi danışdırmağa çalışacaq. Yaxud siz də kimisə danışdıra bilər, müştərək maraqlı söhbətlər edə bilərsiniz. Lakin nə qədər razı olmasaq da, insanlar üzügülər adama meyil edirlər. Qaramat olmaq bir şey deyil. Odur ki, insanlara təbəssüm bəxş edin.
5. Özünüzü sevməyə və öz qüvvənizə inanmağa çalışın. Özünüzü sevə bilsəniz, ətrafı da sevəcəksiniz. Özünü sevmək və eqoistlik ayrı şeylərdir. Xeyirxah və yaxşı işlərdə ilk öncə Allaha, sonra özünüzə təşəkkür edin. Təşəkkür etmək pozitivlikdir. Özgələrinə də təşəkkür edin.
6. Özünüzə hədəf seçin. Başqasının hədəflərinə qulluq etməyin. Şəxsi hədəfləriniz olmasa sizdən daim istifadə edəcəklər və siz imtina etmək gücündə olmayacaqsız. Elə hədəfiniz olmalıdır ki, siz onu xatırladıqda həyəcanlanmalı və hərəkətə keçməli, heç bir şeydən məyus olmamalısız. Əgər hədəfləriniz sizi hərəkətə gətirmirsə, deməli hədəfiniz yoxdur.
7. Həyata boz baxmayın. Hara baxsanız pozitiv şey axtarın, hikmət axtarın. Kifir adam gördükdə onun ən gözəl cizgisini tapın. "Nəyiniz yoxdur"-a fikir verməyin, "nəyiniz vardır" - bax bu əsasdır. Hər şeyə ah-uf etmək, ahu-zar etmək, deyinmək insanı usandırır. Bədbin edin, zəhlətökən edir. Siz uğurlu insanların deyingən olduğunu görməzsiniz.
Elə bu cəhətlərə riayət etsəniz, bir müddət sonra özünüzdə dəyişiklik görərsiniz. Müvəffəqiyyət Allahdandır. Özümə sizə bu yolda uğurlar arzulayıram.
Farid Abdullah