"O üz, hər xətti tövhid qələmindən bir sətir,
O üz ki, göz dəyincə Allahı xatırladar" (N. Fazıl Kısakürək)
Var olmanın gerçək məqsədini qavramış olan hər insan bu gerçəyi digər insanlara ötürməklə məsuldur. Mömin həyatı boyunca sözləri və rəftarlarıyla Allahı xatırladan insandır. Allahın sərhədlərini qoruyaraq davam etdirdiyi həyatıyla, insanları Allaha çağıran, Onu xatırladan model insandır.
Safdır, təmizdir mömin. Gözəldir, imanı ilə gözəldir. Günahsızdır, məsumiyyəti üzündən oxunar. Allahın ən gözəl təcəllilərindəndir, rəftarıyla və danışığıyla olduğu qədər görünüşü ilə də insanlara Allahı xatırladar.
Peyğəmbərimiz (s.v.s), "Gördüyünüzdə sizə Allahı xatırladan, biliyinizi artıran, elmiylə də sizə axirəti xatırladan sizin üçün ən xeyirli yoldaşdır" buyurur və Allahı xatırladan insanın ən yaxşı yoldaş olduğunu xəbər verir.
Mövlana isə "Bir yoldaş istəyərəm" deyər. "Cana can olan, yaraya məlhəm olan, canı mən, yarası mən olan, mənə Mövlanı anladan və xatırladan".
Mömin Allahı çox xatırlayar, bilər ki, ürəyi ancaq Onun zikriylə mutmain olar. Allahın dinini izah edərək, Quran ilə öyüd verərək, yaxşılıqları tövsiyə edib pislikdən çəkindirərək, Allahın ayələrini xatırladaraq çağırışda olar və Allahın buyruğuna uyğun olan deyilə biləcək ən xeyirli, ən gözəl sözləri söyləyər. Möminlərin insanlara Allahı xatırlatmalarının əvəzində tək gözləntiləri vardır - Allahı məmnun etmək və qarşılarındakı adamın da Allahın məmnun olacağı əxlaqda bir insan olmasına vəsilə olmaq... Allahı zikr etmək, Quran əxlaqını izah etmək həm özlərinə, həm də çağırışda olduqları kimsəyə axirətdəki sonsuz xoşbəxtliyi qazandıra biləcək.
Bütün varlıqlar Allaha möhtacdır. Allah isə bizlərin sahib olduğumuz hər cür əskiklikdən münəzzəhdir və O, heç bir şeyə ehtiyacı olmayandır. Allahı unutmuş, üz çevirmiş də olsa, Allahı unutmayan, xatırladan da olsa, ölüm hər kəs üçün tək bir gerçəkdir.
Allah xəstəlik verər, bəla verər Özünü xatırlatmaq üçün. İnsanın ayaqlarının yerə basması üçün dərd verər. Əslində bu, Allahın sevdiyi insanlara lütfüdür. Xüsusilə xəstəliklər insana Rəbbini xatırladar, bu müddət ərzində insan hər an Allahı xatırlayar, Ona yaxınlaşar, ürəyi rahat olar...
İnsan gün ərzində Allahı, gözəlliklərlə təmin edilmiş cənnəti düşünsə, həmişə xoşbəxt olacaq. Bənzərsiz sığınma yurdunda Allahın müqəddəs qullarıyla qarşılıqlı taxtlarda oturub birlikdə Allahı xatırlamaq cənnətə məxsus xüsusi möhtəşəm bir zövqdür, hətta bunu düşünmək də insana böyük xoşbəxtlik verir. Səhərlər şükrlə qalxıb, dilində, qəlbində zikrlə gününü Allaha həsr edən insanın atdığı hər addım Rəbbi üçün olacaq, o addımlar adamı Allahın diləməsiylə sonsuz qurtuluşa aparacaq…
"Qardaşına gülümsəməyin, yaxşılığı əmr edib pislikdən çəkindirməyin, yolunu çaşanlara yol göstərməyin, yol üzərində əziyyət verən tikan, sümük kimi şeyləri qaldırmağın, sənin su qabından onunkuna boşaltmağın sədəqədir" (Terğib)
Fuad Türkər.
Hörmətli oxucular, əgər məqaləni başdan-sona qədər həzz alaraq oxudunuzsa, deməli, burda deyilənlərlə razısınız. Elə isə ətrafınıza baxın. Görün ətrafınızda gördüyünüz, hətta o insan barəsində düşündüyünüz zaman sizə Allahı xatırladan neçə insan var? Və ya siz özünüz insanlara nəyi və ya kimi xatırladırsınız: xeyirxah insanımı, ideal ananımı, qız övladlarımızın mənəviyyatını körpəlikdən korlayan Barbi gəlinciyinimi, "pul kisəsini"mi, "təcili yardım"ımı, Hollivud "gözəlçələri"nimi, gözəl kulinarımı (bu siyahını çox uzatmaq olar)?
Əgər həqiqətən də yaradılış səbəbinizi bilirsinizsə, günü bu gündən ətrafınıza Allahı xatırladan insan olma yolunda irəliləməyə başlayın (əgər hələ bu yolda deyilsinizsə). Unutmayın, bəndə Onun buyurduğunu qəlbən istəyirsə, O, sizə sonsuz yardımlarını göndərəcək!
