Qur”ani Kərim
Z.M.Bünyadov, V.M.Məmmədəliyev
Allah-Təalanın hər zaman hər cür tədbil və təhrifindən, artırıb- əskiltmədən qoruduğu və qiyamətə qədər qoruyub saxlayacağı Qurani-Kərim qəlbləri iman nuru ilə işıqlandıran, insanlara dünya və axirət səadəti bəxş edən ilahi bir kitabdır.
Nazil olduğu gündən özünün əsrarəngiz gözəlliyi ilə hamını heyran edən, oxunduğu zaman ilahi ahəngi ilə hər bir kəsi, hətta da ərəb dilini bilməyənləri belə ovsunlayıb ülvi aləmlərə aparan Quran bəşəriyyətin rifahı və səadəti üçün Allah dərgahından göndərilmiş bir nicat gəmisidir.
Fani dünyanın enişli- yoxuşlu yollarında yorulub əldən düşən, zamanın ağrılı- acılı gərdişindən cana doyan bəşər övladı özünün ən çətin anlarında ancaq Qurana üz tutur. Quranın gücü, köməyi sayəsində özünü ələ alıb Allahın ona əta etdiyi ömür payını layiqincə yaşamaq istəyir. Bu Allah-Təalanın yalnız öz kitabına bəxş etdiyi qüdrətdir. Belə bir qüdrət bəşər zəkasının yaratdığı, insan qələmindən çıxmış heç bir kitaba qismət olmayıb və olmayacaq da!
İslam dini sağlam təfəkkürə, məntiqə əsaslana bir dindir. İlk surəsi “oxu”, “qələm”, “öyrətmək” sözləri ilə başlayan Qurani-Kərim elmə böyük qiymət verir. Elmi, biliyi, mərifəti insanın ən böyük üstünlüyü hesab edir. Allahın bu sonuncu haqq dinində elmə, məntiqə zidd heç bir şey yoxdur. Sadəcə olaraq onu olduğu kimi anlamaq, dərk etmək lazımdır. Allah kəlamı öz ayələrində çox dərin elmi fikirlər ehtiva edir.
Qurani-Kərim ecazkar gözəlliyə malik Allah kəlamıdır. Məhz belə bir ecazkar gözəlliyin nəticəsidir ki, insan Quranı oxuduqda, yaxud dinlədikdə Allah kəlamının heybəti, əzəməti və kosmik ahəngi onu qaplayıb sonsuz göylərə, ülvi bir aləmə aparır. İnsan bu sonsuzluqda qanad çalıb hey yüksəkliklərə qalxmaq, intəhasız ənginliklərə varıb orada qeyb olmaq, əbədiyyətə - lahut aləminə qovuşmaq istəyir.
Allah-Təalanın bəşəriyyət üçün hidayət çırağı olaraq göndərdiyi Qurani-Kərim ərəb dilində nazil edilsədə, sonra bütün dünyəvi dillərə tərcümə edilmişdir. Belə bir müqqədəs kitabı hər hansı bir dilə tərcümə etmək, daha doğrusu onun ehtiva etdiyi mənaları başqa bir dildə oxuculara çatdırmaq, təbbi ki, olduqca çətin və məsuliyyətli bir işdir.
Əl-Fatihə (Kitabı açan) surəsi
Məkkədə nazil olmuşdur, 7 ayədir.
Bismillahir-rəhmanir-rəhim!
1. Mərhəmətli, rəhimli Allahın adı ilə!
2. Həmd (şükr və tərif) olsun Allaha (və ya: Həmd məxsusdur Allaha) aləmlərin Rəbbinə,
3. (Bu dünyada hamıya)mərhəmətli, (axirətdə isə ancaq möminlərə) rəhmli olana,
4.Haqq- hesab (qiyamət) gününün sahibinə!
5.Biz yalnız sənə ibadət edirik və yalnız Səndən kömək diləyirik!
6.Bizi doğru (düz) yola yönəlt!
7.Nemət verdiyin kəslərin yoluna! Qəzəbə düçar olmuşların və (haqqdan) azmışların (yoluna) yox!