Böyük danışmayaq

Yolda çoxdan görmədiyim bir dostumla qarşılaşdım. Cümə günü olduğundan məscidə birlikdə

getməyimizi təklif etdim. O isə etiraz edərək dedi: "Mən hara, məscid hara? Heç məscidə

getdiyimi görmüsən?". Çox təəccüb etdim, inana bilməyib bir daha soruşdum: "Ciddi

sözündür, hələ bu vaxta qədər məscidə getməmisən?". Dedi: "Uşaq yaşımda bir dəfə

aparıblar, ondan sonra getməmişəm". Qəlbini qırmaq istəməyib dedim: "İnşaallah, bir gün

gedərsən". Görüşümüzdən bir müddət keçdi, günlərin biri məscidə daxil olduğum zaman onu

da orada gördüm, namazda hamıdan ön cərgədə idi. İstədim bir vaxtlar dediyi sözü - "Mən

hara, məscid hara? Heç məscidə getdiyimi görmüsən?" yadına salam, amma artıq bunun

faydası yox idi, çünki cavab verə bilməyəcəkdi. O, tabutun içində idi, hamı onun namazını qılırdı...