Əziz Qadin.Net xanımları. Deyəsən mənim şipşirin xəbərim hamınım marağına səbəb olub. Keçən dəfəki xəbərimdə qeyd etmişdim ki, bu xəbərimin 2-ci hissəsi də olacaq. Hazırlamışam, inşaAllah bəyənərsiz və maraqla oxuyarsız. Əgər istəklər çox olsa xəbərimin növbəti hissələrini də hazırlayacam.
Sevdiyim şirniyyatlar: Bütün şirniyyatları xoşlayıram, əsas tortlar, bütün tortları iştahla yeyirəm. Son zamalar isə şərbətli şirniyyatları daha çox xoşlayıram. 25 ildə helə heç vaxt Novruz bayramında bişən paxlavanın dadına özüm öz xoşumla yeyib baxmamışdım, hər dəfə kimsə məcbur edirdi, amma bu il o qədər paxlava yedim ki, hamı, elə özüm də məətəl qaldım. 
Hətta indi də olsa yeyərdim. Bir də Bamiyə. Keçən dəfə bir qonaqlıqda Bamiyə yedim, dəhşət xoşuma gəldi, hələ ev yiyəsinə də dedim ki, bundan mənim üçün qoy, evə də aparacam.
Hələ də o Bamiyənin dadı damağımda qalıb desəm yalan olmaz. Sevdiyim yeməklər isə çox azdı: əsas quru yeməkləri xoşlayıram - salatlar, pizza, lahmacun, noxudlu dovğa, aş, paxlalı yeməklər...
Bir gün də evdə təkəm, balacayam, onda dedim halva bişirim, halvanı bişirəndə 1 qaşıq duz tökdüm, sonra gördüm halva bütöv duzdur, yeyə bilmədim, tez atdım ki, gəlib görən olmasın. 
Məndə bir xasiyyət var, hansı yemeyi bişirdim xoşum gəlməsə, deyirəm dietadayam.
Bir gün sosiska və kartofdan keks etdim, amma gördüm heç yaxşı çıxmayıb, yemədim, dedilər niyə yemirsən, dedim day doydum, dayım oğlu ilə qardaşıma yedizdirdim, dayım oğlu yeyib sonra vəziyyəti pisləşib, daha yemədilər. Hazırladığım yemək ya şirniyyat yaxşı çıxmayanda çox pis oluram. Yeməyi də, bişirməyi də çox sevirəm. Nəsə bişirəndə çox sevnirəm. 
Nisbətdə götürəndə dovğa, yarpaq dolması və qarın qutabı daha çox xoşladığım yeməklərdir. İndi isə keçək ilk dəfə bişirdiyim yeməklərə. 6-7-ci siniflərdə oxuyanda başlamışam şiriniyyatlar bişirməyə. Birinci dəfə "Bakı tortu" bişirmişəm, çoox da gözəl alınmışdı. Həvəsləndim 7-ci sinifdə oxuyurdum, "Ballı tort" bişirdim. Yuxalar qupquru çıxmışdı. Krem düzəldib taxta kimi olan yuxaları qoydum üst-üstə. Bəzəyə bilmirdim, qoz səpdim üstünə. Aparırdım soyuducuya qoymağa birdən kiçik qardaşımla toqquşdum tort sürüşüb düşdü onun başına, qardaşım başladı ağlamağa. 
Baxıb gördüm tort nə tort, qutu kimi düşüb o biri tərəfə, heç nə olmayıb ona. Çox pis alınmışdı. Beləliklə ikinci tortumu toyuqlar yedilər. Bir dəfə də anam getdi nənəmgilə, mənə dedi: ət hazırlamışam, onu küftə bişirərsən axşama. Mən 8-də oxuyurdum küftə bişirməyə tənbəllik elədim. Dedim nə fərqi var ki, qoy kotlet bişirim tez olsun. Küftə üçün hazırlanmış düyülü ətdən qəşəng kotletlər qızartdım. Qoydum atamın qabağına sevinə-sevinə. Sonrasını təsəvvür edin, nə qədər güldülər mənə. Onu da yemək olmadı. Belə-belə, yavaş-yavaş mən də mətbəxdə bişib oldum aşpaz. Onu da deyim ki nə qədər ərzaqlar xarab edib atdımsa heç vaxt anam mənə acıqlanmadı (Allah bütün analara can sağlığı versin, eləcə də mənim anama). İndi də əvvəlki kimi böyük həvəs və maraqla yeni nə görürəmsə bişirirəm. Yoldaşım bəzən xoşlamayanda deyir: bunun əməliyyəsi ilə nəzəriyyəsi düz gəlməyib. Qaynatam isə nə bişirirəmsə yeyib deyir: çox sağ ol, qızım, dadlıydı (mənim xətrimə məcburi) Nə isə çox sağ olun, mətbəxdə başıma gəlməyən qalmayıb. Yazdıqca davamı gəlir. Çox yazmayım ki bezdirici olmasın. 
Ruhəngiz (İstifadəçi)
Ayka bacım, maraqlı xəbərində mənə də yer ayırdığın üçün sənə təşəkkürümü bildirirəm. Hər bir xanım çalışır ki, mətbəxini zənginləşdirsin, yəni başlayır yeni-yeni dadlı reseptlər axtarmağa. Mən də elələrindənəm. Qadin.Net saytındakı yemək və şirniyyat növlərindən çox yararlanmışam. Salatlardan bir-ikisini çıxmaqla hamısını xoşlayıram, dizayna çox üstünlük verirəm. Dolmanın, plovun hər növünü xoşlayıram. Kababın lülə, tikə növünü sevirəm. Balıqla sən deyən aram yoxdur. Şirniyyat mənim yaralı yerimdir. Çünki onların hər cürəsini - tort, piroq, keks, bulka məmulatlarını çox xoşlayıram. Əvvəllər tort tez-tez bişirərdim. Ən çox da bir günümü onun bəzəyini fikirləşirdim, şəklini çəkirdim. İndi o həvəsim qalmayıb. İnşALLAH indi də qızımın növbəsidir ki öyrənsin. ALLAHDAN bütün ailələrə bol ruzi-bərəkət arzulayıram.
Biz bakılılar düşbərəni çox xırda bükürük, ona gorə də ləzzət eləyir adama. Şirniyyatlardan ekleri, napoleon pirojnasını çox sevirəm. Azərbaycanın çox dadlı yeməkləri və şirniyyatları var, ona görə də bölgələrimizin bütün yeməklərini bəyənirəm.
Toyumdan sonra artıq tək bükəcəyimdən o da nə az, nə çox düz 12 saata bükmüşdüm, özü də biri birinə eyni olanı yox idi, amma indi gec də büksəm bir az səliqəli bükürəm. Şirniyyata gəldikdə isə şirniyyatların demək olar ki hamısını sevirəm, həmişə istəmişəm ki mən də şirniyyat bişirə bilim. Ailə qurduqdan sonra daha məsuliyyətli olduğuna görə ilk dəfə bişirdiyim keks yaxşı çıxmadı, daha sonra zebra piroqu bişirdim dadlı çıxdı, artıq demək olar ki şirniyyatı da normasında edəndə əla çıxır. Sonra bişirdiyim şirniyyat ve sevdiyim şirniyyat Ləmanın qaymaqlı və gizli ləzzət qurabiyələridir, çox sağol Ləman. Mənsə bu resepti dəyişib qaymaqlı qurabiyə resepti ilə gizli ləzzət qurabiyəsi edirəm. 
Öz paltarımı tesevvür edə bilməzsiz necəydi. Bulanmayan yer qalmamışdı. Məni həvəsdən salmamaq üçün tortumu təriflədilər. Bir dəfə də bacım rəfiqələriynən gəlincik-gəlincik oynayırdılar, toy edirdiler onlar üçün 2 stəkan düyü bişirmişdim. Süfrə açdım, oyuncaq qablarına plovu çəkdim, uşaqlara verdim yedilər. Dadlı çıxmışdı... Yemək bişirməyi öyrənmək çətin deyil, əsas odur həvəsin olsun. Məndə də həvəs var, bacardığım qədər bişirirəm, bacardığımdan da çox yeyirəm. 
XƏBƏR LENTİ
- ŞƏRHLƏR